Bajet Negeri 2019 sebengkah bajet napi pengawa bepilih negeri, ku presiden PBDS Baru.

Cobbold John Lusoi

KUCHING 6 Nov: Bajet Negeri 2019 mandangka perintah negeri Gabungan Parti Sarawak (GPS) nyikap diri dikena napi pengawa bepilih negeri, ku Presiden Parti Bansa Dayak Sarawak Baru (PBDS Baru) Cobbold John.

Iya pechaya agih belanja penyampau RM11.9 biliun ke nyadi rikut bajet dalam sejarah Sarawak tebal agi dikena nginti undi rayat.

Kemari, Kepala Menteri Datuk Patinggi Abang Johari Tun Openg mantaika perambu Bajet Negeri 2019 ba Hari Keterubah Aum Dewan Undangan Negeri (DUN).

Nengah perambu nya, agih belanja RM9.073 biliun tauka 76 peratus diungkup ngagai program pemansang lalu laluh 24 peratus iya nya RM 2.481 biliun ungkup belanja operasyen.

Nambahka nya, Abang Johari ke mega Menteri Pekara Wang enggau Pengatur Ekonomi netapka 67 peratus tauka RM6.049 biliun ari semua agih belanja pemansang deka dipelanja di kandang menua pesisir.


“Nyata agih belanja ke besai dalam sejarah tu dikena nginti, matak undi rayat Sarawak.

“GPS ngasai keruga Pakatan Harapan (PH) ti udah menang ba pengawa bepilih besai bulan Mei tu tadi lalu numbuhka Perintah Besai di Putrajaya,” ku Cobbold.

Iya mega madah bida besai entara Bajet Nasional ti semina ngagihka RM4 biliun ngagai Sarawak lalu ari sukut nya GPS bisi pengelebih.

Tajapia, Cobbold enda nyadang Sarawak deka ngadu pengawa bepilih ngenyit ‘snap election’, beambi ulih ari pengelebih GPS diatu.

Ku iya, pengawa bepilih negeri tetap deka diatur dalam timpuh kurang tiga taun iya nya ba taun 2021.

Ngenang bajet besai ke disedia perintah negeri kelebih agi ba pekara pemansang di menua pesisir, iya netapka pekara nya manah ungkup peranak ke diau di kandang endur nya.

Menua pesisir di Sarawak kelebih agi ke jauh di ulu ku iya udah lama tinggal ari pekara pemansang lalu nya ba jeman perintah Barisan Nasional (BN) ke alai diatu udah bebali kulit nyadi GPS.

“Nengah bajet tu kitai ngarap GPS ngaga mayuh agi jalai di menua pesisir, nyendia bekal lektrik enggau bekal ai beresi,”ku iya.

Iya mega ngarap rayat beambi ulih ari program pemansang ke bisi disedia ngambika ikas ekonomi sida bela nambah.

Ngenang sentang nadai agih belanja disedia baikka nya ba Bajet Nasional enggau Bajet Negeri ungkup pengawa nyukat kelingi tanah NCR, Cobbold ngarap GPS ulih berundingka sentang pekara nya.

Ku iya, isu tanah siti isu ke besai sereta seruran dampih ba ati rayat Sarawak.

“Perundingka mih GPS, gaga inisiatif, baka ni ulih nampung pengawa nyukat kelingi tanah NCR,” ku Cobbold.

Entara projek di kandang menua pesisir ti deka digaga ke dirintai dalam bajet iya nya:

  1. Jalai Sg Bidut/Kpg Tutus /Kpg. Sebedil/Kpg Bungan Kecil,
  2. Jalai ari Sibu Jaya-JalaiKong Yit Khim
  3. Jalai Pasai Siong Hilir
  4. Jala ari Marudi-Mulu nengah Long Terawan
  5. Jalai Ulu Tubai nuju ke Mentawai/Gunung Buda
  6. Jalai Pakan, Ulu Julau, Ulu Kota Pakan (Renggat II)
  7. Jalai Nanga Menuan/Nanga Setepus
  8. Ngangkatmanah Jalai Belaga-Menjawah
  9. Jalai Baru Tatau-Kuala Tatau
  10. Jalai Kpg Sebauh-Jalai Sebauh Hilir
  11. Jalai Kpg Igan-Rh Sungai Ilas enggau Kampung Sah, Kebauw, Batang Igan
  12. Jalai Rantau Panjang/Rassau di Batang Igan Fasa 1
  13. Jalai Ijok/Teguyo/Lempaong/Batu Pesok/Rantau Layang
  14. Jalai Nanga Kesit-Ulu Lemanak-Engkari, Lubok Antu
  15. Jalai Kpg Tuie/Kpg Suri
  16. Jematan Sg Limbang, Jematan Sg Bunut No 2
  17. Projek Jematan Long Lama, Batang Baram
  18. Jematan Batang meraka Sg Kemena di Sebauh
  19. Jematan Marudi meraka Batang Baram

Kelimpah nya, perintah negeri mega deka ngaga empat jematan baru iya nya Jematan Muara Lassa, Mukah, Jematan Batang Rambungan, Lundu, Jematan Bintulu-Jepak Bridge meraka Kuala Kemena, Bintulu, enggau Jematan Batang Lupar. — DayakDaily