MIRI: Nemu ungkus pengidup ti majak tinggi diatu, perintah nengah bajet 2018 ke deka dipejuraika Menteri Besai kena 27 Oktober tu ila, deka mantu mutarka penanggul nya, pia ku MP Parlimen Sibuti Datuk Ahmad Lai Bujang.
“Kitai pechaya perintah meda penanggul ti ditapi rayat diatu nya kebuah Menteri Besai minta rayat ngenataika perambu sida dalam Bajet 2018,” ku iya.
“Bajet 2018 deka fokus ngagai 14 batang kategori ke dipelaba ulih mantu semua rayat nyengkaum ti menua pesisir,” ku iya.
Ku iya, ti dikemeratka endar dalam Bajet 2018 nyengkaum ekonomi digital, ungkus idup, pengawa berumah, pengidup di pasar enggau servis nyaga pengerai.
Perengka pengangkut enggau infrastruktur, pemansang menua pesisir, rampa menua enggau betanam betupi, nembiak lumba enggau main, adat main asal enggau dagang temuai nyengkaum pengelikun sereta pengelurus bejalaika pengawa mega deka dikemeratka.
Iya mega ngarapka perintah ngenyampatka pengawa ngangkatmanah enggau ngemanahka sekula di menua pesisir ke udu raya udah rusak.
Bajet 2018 mega dikearap ulih ngangkatmanah infrastruktur di menua pesisir baka jalan alun, bekal ai enggau elekterik, ku iya.
Taja pan nyauka serap menua pesisir udah bisi perengka guna nya tang bisi mega ke agi tinggal sereta begunaka pemansang nya, ku iya.
