Awang Raweng mai reti besai ba sejarah pengelikun Sarawak enggau Malaysia

Neilson(kiba) lebuhka berandau enggau Bujang Berani(Niang Awang) ba bulan Ogos tu tadi.

Dikarang Chris Bishop

KUCHING, 18 SEPTEMBER: Bujang Berani Datuk Awang Raweng, 95, midang di rumah iya di Sri Aman sehari tu.

Pemidang penerima Midul George Cross nya disahka Direktor Pekara Veteran Soldadu Malaysia(ATM) Mejar Pahot Joll.

Ngenang cherita niang, Pemansik sejarah ari Universiti Malaysia Sarawak(UNIMAS) Professor Madya Dr Neilson Ilan Mersat madah Awang siku Bujang Berani ti besai endar reti ba sejarah pengelikun menua Sarawak enggau Malaysia.

“Nya alai pemidang iya tu endang siti pengerugi ti besai ngagai kitai di Malaysia.


“Iya(Awang) sanggup nanam diri di menua orang di Malaya sebedau merdeka menya, belaban enggau bala komunis.

“Pemerani iya dikelala dunya luar ngujungka iya bulih Midul George Cross,”ku Neilson madah ngagai DayakDaily.

Taja pan iya udah nadai ku Neilson, kitai arapka semengat iya terus idup dalam runding rayat Malaysia awakka kitai sama-sama seruran ngintu pengelikun menua kitai Malaysia.

Awang siku penyidi Iban ti datai ke Malaya ba taun 1950-an alai iya dipasuk dalam Rejimen Wordcestershire enggau Sherwood.

Niang nerima Medal George Cross ti diberi nama nyerumba Raja George VI ari Queen England nyadika basa pemerani ti udah dipandangka iya.

Sejarah ke pemadu tebilang alai Awang betachah ngelaban 50 iku munsuh komunis dalam babas di Kluang,Johor kediri ketegal ti deka ngidupka siku soldadu British ti bakal.-DayakDaily