APMM mujur ngenanka 37 bot orang berikan ari menua luar taun siti nyin tadi

Arrest - DayakDaily.com file pic. // Photo: Pixabay

KUCHING, Jun 21: Ijinsi Penerit Adat Maritim Malaysia (APMM) Kandang Sarawak udah ngenanka 37 bot orang berikan ari menua luar ke berikan nadai pemendar ba kandang ai menua sepemanjai taun siti nyin tadi, lalu rekod penyampau ngetan ke pemadu mayuh kenyau ditumbuh urung 13 taun ke udah.

Belalauka statistik, ari taun 2006 ngagai Mei tu tadi, APMM Kandang Sarawak udah ngetan 140 buah bot orang berikan ari menua, enggau penyampau pengabis tinggi taun siti nyin tadi, tebal agi ngaul orang berikan ari Vietnam.

Trend penambah bot orang berikan ari menua luar ke ditan ulih dipeda kenyau ari taun 2014 lebuh ari dua bot ke ditan taun nya, penyampau nambah ngagai 11 ba taun 2015, enggau 14 ba taun 2016, sebedau ngenyit nambah lebih dua kali lipat taun siti nyin tadi.

Taun tu ngagai Mei tu tadi, lima orang berikan menua luar ke ngaul peranak Vietnam udah ditan APMM Kandang Sarawak ketegal berikan nadai pemendar ba kandang tasik menua.

“Kena Mei 23 taun siti nyin tadi, kitai udah ngetan dua bot berikan ari menua luar 47 iku kru ke nyarung diri nyadi bot kargo menua tu ngambika ulih berikan ba kandang tasik menua urung 170 batu nautika ari Tanjung Po ditu. Semua kru nya peranak Vietnam,” ku Sapit Direktor Operasi Maritim Sarawak Kapten Maritim Shahref Steve Mac Queen Abdullah baru-baru tu. — DayakDaily