Maxis eKelas meri pemaik ngagai pelajar kelebih agi di menua pesisir negeri tu

Robert (kiri) melawat pelajar yang mengikuti program eKelas di pusat Internet Kampung Tebelu, Sebuyau.

SEBUYAU, Jun 21: Diatu komuniti menua pesisir kelebih bala nembiak bulih pemaik ari sukut pelajar nengah Maxis eKelas ke ulih diakses di beberapa Palan Internet di negeri tu.

Maxis eKelas iya nya sesi belajar digital ke ngaul interaksi entara nembiak enggau pengajar nengah chara online dikena ngangkatka prestasi akademik nembiak menua pesisir setipak enggau sulibus pelajar menua.

eKelas tu fokus ngagai tiga mata pelajar iya nya Sains, Matematik enggau Bahasa Inggeris ungkup nembiak form satu ngagai form tiga.

Ketuai Pegawai Eksekutif Maxis, Robert Nason madahka nengah pemisi teknologi enggau internet nya mai pelajar digital semak agi enggau komuniti lebih agi di menua pesisir.

“Maxis eKelas program Tanggungpengawa Korporat kami ke ke nguna teknologi enggau internet, ke nyadi pengelebih digital, kami berasai gaga ulih meri akses isi pelajar ke bisi interaktif ngagai nembiak enggau pengajar.

“eKelas nya sesi pelajar enggau ngajar ti ngerinduka sereta ngagit lalu matak perati nembiak,” ku iya madah ngagai pemberita lebuh dikerandau ba program eKelas di Kampung Tebelu, ditu kemari.

Sama bisi datai, Ketuai Maxis Kandang Sarawak, Alex Bong, Sapit Direktor Suruhanjaya Komunikasi enggau Multimedia Malaysia (MCMC) Sarawak, Scott Kueh Sui Yek enggau Ketuai Kampung Tebelu, Polly Mat.

Kelimpah meda tutorial ke dipandang terus nengah sesi aum video, siti demonstrasi randau dipandang terus iya eCikgu bela dibantaika.

eCikgu platform ke alai bala nembiak ulih berandah enggau pengajar lalu betanya chara terus.

Di Sarawak aja bisi 13 Palan Internet di Kuching, Sibu enggau Miri ti muka program eKelas iya nya di Kampung Tebelu (Kuching), Kampung Quop (Kuching), PPR Dahlia (Kuching), Kampung Telaga Air (Kuching), Kampung Luak (Miri), Kampung Lambir (Miri), Kampung Sibuti (Miri), Kampung Pandan (Lundu), Machan (Kanowit), Melugu, (Sri Aman), Kampung Bandung (Sibu), Sungai Bandung (Serian), Kampung Taee (Serian). — DayakDaily