Apil Gerija SIB bekaul dokumen deka dipending kena Nov 7

Gavel. — DayakDaily.com file pic. // Photo: Pixabay

PUTRAJAYA, Julai 31: Kort Apil netapka Nov 7 mendingka apil ari Gerija Sidang Injil Borneo (SIB) sentang dokumen ke ditemu bekaul enggau pemutus Kabinet ba taun 1986 ti nagang ngena leka jaku Allah ba utai tulis ke ukai ba pengarap Islam.

Luyar Tan Hooi Ping ti ngarika gerija nya enggau Presiden iya Datuk Jerry W A Dusing @ Jerry W Patel madahka kort mega netapka Okt 22 maya ngaduka kes ungkup sida ke bekaul madah ngagai kort sentang sebarang pelaba dikena mutarka kes.

Apil nya keterubah diperambu dipending kemari tang diubah ngambi ulih ngaduka kes ba mua Sapit Pengerejista Aina Azahra Arifin.

Ku Tan, iya udah madah ngagai kort ke alai sida ke bisi kaul enggau apil nya benung berandau ke dipelaba ulih mutarka pekara nya.

Luyar Kanan Federal Shamsul Bolhassan, ngarika Opis Menteri Dalam Negeri enggau kerajaan, madah ngagai pemberita ke alai iya nadai mantah peminta ari sepiak gerija ngambika ngatur baru pengawa mendingka berindik ari sepiak gerija udah ngenataika representasi dikena mutarka kes nya. — DayakDaily