Projek, program ke udah dikemendar perintah ke sebedau tu patut dipajakka

Silhouettes of workers on a construction site. — DayakDaily.com file pic. // Photo: Pixabay

KUALA LUMPUR, Julai 31: Anang ngenusah rayat semina ketwgal ubah perintah ba renggat perintah besai enggau negeri.

Kaban Parlimen Beaufort Datuk Azizah Mohd Dun madah, rayat kelebih agi di menua pesisir deka berasai asa enti projek enggau program ke diguna rayat dikinsil taja pan udah dikemendar perintah Barisan Nasional (BN) sebedau tu.

“Nyadi tanggungpengawa perintah neruska projek enggau program ke pemaik rayat nyengkaum di Sabah enggau Sarawak,” ku iya lebuh bejaku bejuraika jaku Tuanku Yang di-Pertuan Agong di Parlimen.

“Aku ke nyadi pengari ari negeri Sabah ngelalu sereta meri terima kasih ngagai jaku Tuanku ti madahka perintah deka majak bejalaika bemacham program enggau projek ngambika semua rayat di menua tu ulih ngasaika pengelantang nyengkaum di Sabah enggau Sarawak,” ku iya.

“Tu setipak enggau polisi perintqh ngambika pengidup rayat diangkat lalu pengaya menua dikunsi enggau sebela, tang aku berasai asa lebuh mayuh projek ti dikemendarka perintah ke sebedau tu enggau tuju mantu rayat di serata menua nyengkaum Sabah enggau Sarawak udah dikinsil.


“Asaika pengasa ati rayat ti begunaka semua nya enti sida dipadang sentang pekara tu,” ku Azizah.

Iya minta ngambika projek enggau program ke diguna rayat sekalika udah dikemendar tauka dalam proses diterus ngambika rayat di menua pesisir kelebih agi di Sabah enggah Sarawak ulih ngasaika pemansang ke deka diguna sida. — DayakDaily