Abang Johari: Selamat ngintu Hari Gawai Dayak, Terima kasih ketegal bebasaka PKP

Abang Johari sereta bini, Datuk Amar Juma'ani Tuanku Bujang meri jaku Selamat Hari Gawai Dayak nuju semua bansa Dayak.

KUCHING, Mei 31: Kepala Menteri Datuk Patinggi Abang Johari Tun Openg meri jaku Selamat Ngintu Gawai Dayak ngagai rayat Sarawak bansa Dayak di selampur menua.

Ba jaku Pesan ‘Khas’ Hari Gawai 2020, Abang Johari mega meri jaku puji ngagai semua rayat ti udah bebasaka Perintah Tagang Pemindah (PKP) alai ketegal nya, pengerami Gawai taun 2020 enda baka taun ke udah.

“Ba musin pengerami baka Gawai Dayak, nadai utai bukai ke tau mai pengaga kelimpah ari begulai enggau diri sebilik ba rumah panjai. Tang serak tu, engka mayuh ke enda ulih pulai ke menua diri ketegal PKP ti nagang kitai mindah ari siti pelilih ke siti pelilih bukai.

“Aku pechaya, mayuh mega bansa Dayak ti kereja ba menua bukai kelebih agi sida ti kereja ba industri minyak enggau gis enda ulih pulai ke Sarawak.

“Nadai ngawa, ke pemadu berat kitai semua selamat ari penyakit Covid-19. Enti penusah tu udah diputar jemah, kitai deka ngerami Gawai baka taun-taun ke udah. Terima kasih ketegal bebasaka PKP,” ku Abang Johari.


Tambah Abang Johari, PKPB nyentuk ngagai 9 Jun tu enda ngemendar bansa Dayak ngerami Gawai baka ke ngelamatu.

Ku iya, pengawa ngelalu pengabang sereta ngabang ari rumah ke rumah enda dikemendar, semina pengawa begelumu diri sebilik enda ngelui ari 20 iku aja dikemendar ba hari keterubah Gawai.

Ngenang pemerinsa ke ditapi rayat ketegal PKP, Abang Johari madah Perintah Negeri udah ngeluarka RM16.4 juta dikena nyendia bekal pemakai ngagai setengah juta rayat Sarawak.

“Bekal pemakai dianjung ngagai selampur Sarawak nengah jalai darat, sungai sereta langit. Ungkup kandang endur ke jauh di ulu sungai, bekal pemakai dianjung nguna bilun engkabang soldadu enggau Bomba.

“Bantu Khas Sarawakku Sayang(BKSS) 1.0, 2.0 enggau 3.0 mega diberi ngagai rayat ngambi ulih mantu ngelempung tating belanja rayat ti udah putus penatai pemisi ketegal empas PKP,” ku iya.

Antara sekeda bantu dalam BKSS(1.0, 2.0 enggau 3.0) iya nya bantu wang ngagai raban B40 nyengkaum raban orang bujang beumur 21 taun ke atas ti penatai pemisi kurang ari RM2,000 sebulan.

Bayar lun ungkup orang dagang mit enggau jelan pemesai ditangguh, lesen dagang tau nibuh dibayar enggau suwa kedai tauka opis diberi putung, insentif ninting bulan diberi ngagai raban orang baris mua ti bekereja ngemunas virus Covid-19 sereta bayar insentif ngagai raban orang ti putus penatai pemisi.

Kelimpah ari nya ku Abang Johari, ketegal pemerat ngagai rayat servis bank mindah kin kitu bisi disedia ba kandang endur ke nadai mesin ATM baka ke di Pakan.

“Tajapan bebaris panjai ketegal deka ngeluar duit, bank mindah kin kitu nyeliah mensia mayuh arika mindah ari siti pelilih ngagai pelilih bukai alai pemindah tu sigi enda dikemendar enti nadai permit polis,” ku iya.

Tambah Abang Johari, Perintah Sarawak ulih nyendiaka semua bantu ngagai rayat ketegal Perintah Negeri bisi belanja ke tegap.

Ku iya, Sarawak ngembuan rizab duit ke chukup tegap lalu jauh manah ari negeri bukai.

“Duit tu disimpan betaun-taun ke udah lalu ditambah ninting taun. Asil ari nya udah meri pengelantang ngagai kitai maya napi pemar,” ku Abang Johari. — DayakDaily