KUALA LUMPUR, Mei 5: Bisi 586 palan ngundi tumu di serata menua dibuka pukul 8 pagi tu ngambika 278,590 raban pengelikun enggau bini sida ulih ngundi tumu ba Pengawa Bepilih Besai ke-14 (PRU14).
Raban penyaga pengelikun tu baka Polis Diraja Malaysia (PDRM), Angkatan Tentera Malaysia (ATM) enggau Pasukan Gerakan Am (PGA) sereta bini sida.
Palan ngundi iya nya ba Indu Opis Polis Kontinjen (IPK), Indu Opis Polis Pelilih (IPD) enggau kem-kem soldadu.
Palan ngundi deja ditutup berenggat entara 5 lemai enggau 7 malam, lalu bisi mega sekeda palan ngundi ditutup tumu entara 1 tengahari enggau 3 lemai.
Proses ngundi tumu ditetapka nengah chara ngundi baka selama ti dipejalaika 6,376 pengereja pengawa bepilih.
Proses nya deka dikemataka pengari chalun.
Keretas undi tumu enda diitung ba palan ngundi sehari tu tang ditaruh ba endur ke likun baka di lokap balai polis.
Keretas undi semina deka dikira maya hari muai undi 9 Mei, berengkah pukul 4 lemai. — DayakDaily
