SIBU, Mei 29: Kaunsil Sungai-Sungai Sarawak (LSS) kemari udah ngemendarka penambah 13 pejalai bot ekpres dikena ngangkut lebih ari 1,000 penumpang ti deka mulaika diri ngintu Gawai Dayak ke menua.
Pemantu Kontroler SRB Sibu (Kandang II), Hatta Morshidi madahka semua 13 pejalai tambah nya ungkup pejalai Sibu/Kapit.
Ku iya, naka ke diatu nadai udah nerima ripot kes bot ekpres kelalu sarat ngundan penumpang.
Penyampau penumpang dipelaba nambah ungkup pejalai ari Sibu-Kapit enggau Kapit-Balleh/Putai, laban perengka pengangkut sungai sigi agi dikeandalka penumpang.
Maya Gawai Dayak 2017, puku rata penyampau penumpang ti ngena Penyangkai Ekpres Sibu ninting hari manggai 8,000.
Penumpang di terminal Kapit enggau Song bela ngerikod urung 4,000 penumpang lalu 2,000 penumpang dirikod ba penyangkai kapal Belaga, ku Hatta.
Berebak enggau nya, renggat ketwrubah operasi ungkup pengerami Gawai Dayak di serata negeri dipejalaika belabuh Mei 25 ngagai 31 lalu renggat kedua deka berengkah ari Jun 8 nyentuk 10. — DayakDaily
