Willie enggau Ali nyereta PPBM

Willie Mongin (kiba) enggau Ali Biju

KUCHING, 23 Ogos: Raban ex-Sapit Presiden Parti Keadilan Rakyat (PKR) Datuk Seri Mohamed Azmin Ali kemari nyereta Parti Pribumi Bersatu Malaysia (PPBM) enggau rasmi.

Pom nyadi kaban parti sida disua ex-ketuai PKR nya ngagai Presiden PPBM Tan Sri Muhyiddin Yassin maya Kongres Negara 2020 ke diatur di Kuala Lumpur kemari.

Kelimpah ari Azmin ke mega Menteri Dagang Antarabangsa enggau Industri, raban 10 MP ke bukai nyengkaum MP Ampang ke mega Menteri Pengawa Berumah enggau Kunsil Kandang Menua Zuraida Kamarudin sereta MP Indera Kota ke mega Menteri Komunikasyen enggau Multimedia Datuk Saifuddin Abdullah.

Nitihka riput FMT kemari, MP Puncak Borneo Willie Mongin enggau MP Saratok Ali Biju bela nitihka singkang raban nya.

Bela nyereta Azmin iya nya MP Bandar Tun Razak Kamaruddin Jaffar, MP Nibong Tebal Mansor Othman enggau MP Batu Pahat Rashid Hasnon.

Ba kaul ke sama, MP Segamat Datuk Seri Santhara Kumar nyereta parti nya pengudah nyuaka pom pun bulan tu.-DayakDaily