KUALA LUMPUR, Ogos 9: Urung 41,800 iku penerima bantu Pengelantang Pendiau ari Opis Pengintu Pengelantang Pendiau Raban Bansa entara bulan Januari ngagai Jun taun tu, pia ku Sapit Menteri Besai Datuk Seri Dr Wan Azizah Wan Ismail.
Iya ke mega Menteri Pemansang Orang Indu, Ruang Bilik enggau Raban Bansa nya ketegal bemacham pekara baka pemati ke bisi 11,874 kes; tukar skim bantu bukai (4,242 kes); enda nitihka kriteria pematut (4,090 kes) enggau pindah ke luar pelilih menua (3,132 kes).
Sepenyampau 2,635 kes mega ketegal penerima udah ulih ngatika diri; 22 kes ditanya ngagai ejensi bukai sereta 15,820 kes ketegal pejara bukai baka udah suman ari penyakit enggau ngembuan jalai pemansut penatai pemisi bukai.
“Tetiap bantu ke diketu deka dipadah ngagai klien nengah surat ti dikeluarka nengah sistem e-Bantuan. Kelimpah ari nya mensia mayuh mega tau meresa nengah online sistem e-Bantuan bekaul enggau status pinta bantu sida,” ku iya.
Iya nyaut tanya Sivakumar Varatharaju Naidu (PH-Batu Gajah) sentang sebana bantu pengelantang pendiau ke diketu ke nadai sebarang padah ba Bilik Khas Dewan Rakyat, kemari.
Nampung baru, Dr Wan Azizah madahka opis menteri iya nengah Opis Pengintu Pengelantang Pendiau Raban Bansa (JKM) meri bantu pengelantang pendiau ngagai 485,866 penerima ke ngena belanja RM839 juta nyentuk Jun taun tu.
“Dipelabaka nyentuk ujung taun tu, RM1.5 bilion agih belanja deka dikena nampung belanja ke bayar bantu ninting bulan enggau bantu sekali,” ku iya.
Sentang isu proses peminta bantu pengelantang pendiau ke begunaka timpuh ke kelalu lama ngulihka timbal, Dr Wan Azizah madahka bisi beberapa faktor mngujungka pekara nya nyadi baka tating kereja laban penyampau ke minta kelalu mayuh.
Ambika chunto, nyentuk Jun taun tu bisi 71,864 iti peminta kes baru ke diproses semina 1,919 iku pengereja pengawa.
Puku rata nisbah tating kes peminta baru ke dipansik iya nya siku pekereja ngaduka kes ngagai tetiap 37 kes (1:37), lalu nisbah ungkup staf ti ngaduka kes aktif ba taun 2018, bisi 485,866 kes ke alai siku pekerja ngaduka 253 kes. — DayakDaily
