KOTA SAMARAHAN, Jan 23: Sistem Aliran Ringan (LRT) ti deka digaga di Kuching enggau kandang ngelingi, enda begunaka ungkus ti mar.
Nukuka pekara nya lebuh bejaku ba aum PBB Zon 2 di Dewan Suarah ditu kemari, Kepala Menteri madah, projek nya enda begunaka ungkus belanja besai baka ti dipejalaika di semenanjung Malaysia.
Penerang Datuk Patinggi Abang Johari Tun Openg nya lalu nyeliahka dawa parti penyakal bekaul pekara nya.
Minggu siti nyin tadi DAP Negeri Chong Chieng Jeng minta Kepala Menteri madahka mayuh agi penerang bekaul projek nya, ukai semina madahka maya tembu sekadar dalam timpuh sepuluh taun.
Ku Abang Johari, iya deka mantai enggau silik agi bekaul projek nya dalam bulan Mac ila seraya madahka perintah negeri ukai meseti nundaka model ti dikena di Semenanjung.
Ku iya, perintah negeri udah ngaga pansik sebedau madah silik agi sentang projek nya.
Idea baru ke ditengkebang Kepala Menteri nya deka nyaup ngurangka penyekut jalai ti diasai penguna jalai alun di bandar raya Kuching enggau kandang ngelingi. — DayakDaily
