JULAU, Ogos 21: UMW Corporation Sdn Bhd (UMW) nengah kerejasama Gerempung Bantu Perubat Malaysia (Mercy Malaysia) udah bejalaika program mobile klinik di Rumah (Rh) Anthony Bau, Nanga Sugai, Rantau Tapang, Mujok, ditu berengkah ari Ogos 17 ngagai 19 tu tadi.
Servis pengerai nya diberi ngagsi peranak bansa Iban di Rh Anthony Bau, Rh Mengiring, Rh Gerasi Ak Kapi, Rh Entili, Rh Anthony Gelayan enggau Sekula Primari Kebangsaan (SK) Nanga Ju.
Nya entara tiga juluk program tanggungpengawa sosial korporat (CSR) UMW nemgah bantu Mercy Malaysia di Sarawak taun.
Ketuai Program, Martin Jandom madahka kandang pendiau bansa Iban itu dipilih ketegal ngembuan penyampau tubuh 700 iku sereta jauh di pesisir ti ngujungka sida pedis deka ngulihka servis pengerai.
Ku iya, servis pengerai ke pemadu semak iya nya di Klinik Pengerai Maong ke urung sejam pejalai ngena bangkung tauka pejalai ke lama agi enti maya ai mabu.
“Bisi 41 iku nyereta misi program nya, 18 sukarelawan perubat baka lutur, lutur ngeli enggau raban farmasi, lalu ke bukai nya staf UMW ke mega pengemeran media chelak enggau elektronik.
“Sekumbang program nya, bisi 85 pesakit ari rumah panjai udah diperubat baka meresa darah tinggi, berat enggau merubat ngeli,” ku iya. — DayakDaily
