Ulah Petronas dipeda baka enda ngakun MA63 — Priscilla Lau

Petronas logo

KUCHING, Jun 6: Siku luyar kemari mantah ulah kompeni minyak enggau gis nasional, Petronas ti deka mutarka isu hak bekaul minyak enggau gis di Sarawak ke mai pekara nya ngagai Kort Tinggi.

Petronas kena Hari Satu udah ngaga fail peminta ba Kort Tinggi dikena ngulih kuasa ba Akta Pemansang Petroleum 1974 (PDA) ke nyadi undang-undang ke dikena ba industri petroleum di Malaysia.

“Berindik ari nya, kompeni minyak nasional bepenemu sigi patut sida minta kort meri kuasa ba hak nya, ke nyadi siti pemar besai ngagai Sarawak,” ku Priscilla Lau ba aum media di Sibu, kemari.

Ku iya, pekara nya mandangka Petronas enda nganggap Sarawak nyadi kaban ba pengawa numbuhka Malaysia, lalu Sempekat Malaysia 1963 nadai reti.

“Enda ngakun Sarawak enggau tasik sereta pemansut negeri tu nyata mandangka sida enda ngakun MA63. Enti MA63 enda sah, reti nya nadai Malaysia,” ku iya ke bediri minta pilih ba kerusi Parlimen Lanang nengah tiket Sarawak Peace Party PRU ke-14 empai lama udah.

Petronas ba sebengkah penerang Hari Satu tu tadi madah, kompeni nya pengempu eksklusif pemansut petroleum, sereta nyaga lalu ngemata industri keterubah nya di serata Malaysia nyengkaum di Sarawak.

“Petronas pechaya penentu ari Kort Tinggi deka mantu meri pengamat sentang hak enggau penuduk suda ari baruh PDA.

“Petronas agi komited nyukung aspirasi Sarawak ngaul diri dalam industri minyak enggau gis di negeri tu, seagi dalam kandang langkar kereja PDA,” ku iya. — DayakDaily