English version can be read here: https://dayakdaily.com/uggah-police-permit-no-longer-required-for-inter-zone-travel-from-aug-15/
KUCHING, 11 Ogos: Pemindah entara Zon 1 nuju Zon 2 di Sarawak enda agi begunaka permit polis berengkah 15 Ogos tu, ku Chairman Komiti Pengintu Penusah Ngenyit Negeri Sarawak (JPBNS) Datuk Amar Douglas Uggah.
“Pengudah berandau enggau pemesai ari opis pengerai sereta industri dagang temuai ba sentang pekara pengerai enggau ekonomi, JPBNS mutus ngemendar pemindah entara zon enggau enda begunaka permit polis,” ku iya ba aum pengarang berita di Kuching kemari.
Perintah Negeri neritka tagang pemindah entara zon berengkah 1 nyentukka ngagai 14 Ogos.
Tagang nya diterit ketegal penyampau kes positif Covid-19 ti majak nambah lalu ngujungka Pelilih Kuching betukar status ngagai Zon Merah kena 25 Julai tu tadi.
Zon 1 mungkur Pelilih Kuching, Samarahan enggau Serian ti dalam status merah enggau kuning alai Zon 2 ke dalam status hijau ngarika Sri Aman, Betong, Sarikei, Sibu, Kapit, Mukah, Bintulu, Miri sereta Limbang.
Tetiap iku orang ti deka mindah entara kededua zon dalam timpuh 1 nyentuk ngagai 14 Ogos meseti dulu ngulihka permit ari polis.
Permit tau nibuh diguna enti pemindah nya ketegal ti bejalaika pengawa rasmi, ketegal bisi pemati, berubat ke spital tauka ngusung bala kaban belayan ti bisi sakit raya. — DayakDaily
