Uggah: Palan pengerai menua pesisir disikap ngambi ulih ngadu pengawa beperesa Covid-19

Datuk Amar Douglas Uggah Embas
IBRACO WEBSITEI

English version of this story can be read here: https://dayakdaily.com/rural-healthcare-facilities-being-upgraded-to-handle-covid-19-testing/

KUCHING, Mei 20: Palan Pengerai di kandang menua pesisir diatu benung diangkatmanah ngambi ulih ngadu ‘swab test’ enggau pengawa beperesa nguna Rapid Test Kits (RTKs) ti bekait enggau Covid-19.

Chairman Komiti Pengintu Penusah Ngenyit Sarawak (JPBNS) Datuk Amar Douglas Uggah madah, pemutus nya digaga Opis Pengerai Negeri pengudah ngambi kira lebih 5,000 pelajar ari Malaya, Labuan enggau Sabah pulai ke Sarawak lalu pulai menua diri empu nyengkaum sida ke diau di menua pesisir.

“Kitai deka nentuka sebarang kes ke bekait enggau Covid-19 ditemu tumu,” ku iya ba aum pengarang berita di Kuching kemari.

Naka kemari, Sarawak udah ngatur pemulai 7,446 pelajar ari Malaya, Labuan enggau Sabah.

Ba sentang pengawa beperesa tubuh, Uggah madah makmal Universiti Malaysia Sarawak deka berengkah bejalaika tanggungpengawanya seharitu.

Spital Besai Kuching (SGH), Spital Sibu enggau Spital Bintulu sigi udah dulu ngadu pengawa beperesa tubuh bekait enggau Covid-19.

“Seiku pakar madah pengawa ngelaban pengerekai Covid-19 baka ke pengawa madamka api ti makai kampung. Api meseti dipadam tumu sebedau ngerekai ke bukai,” ku Uggah.

Iya madah semua inisiatif tu digaga dikena napi alun kedua Covid-19, enti amat nyadi.

“JPBNS belajar ari peneleba sereta pengilap ke udah dikereja menua bukai ngambika Sarawak sedia napi alun kedua,” ku Uggah nambah. — DayakDaily