Uggah: Kuntrektor diberi timpuh tambah nembuka projek

Uggah (duduk dua ari kiba) berandauka sekeda pekara enggau Pemesai Opis Betanam Betupi Betong Petrus Kang.

KUCHING, JUN 24: Kuntrektor deka diberi timpuh tambah endur sida nembuka projek perintah ketegal krisis Covid-19.

Sapit Kepala Menteri Datuk Amar Douglas Uggah madah Perintah Negeri nerima kebuah mayuh projek di selampur negeri tejanggal ketegal Atur Tagang Pemindah(PKP) ti diterit ngambi ulih ngendurka pandemik.

“Kitai nadai mantah atur meri timpuh tambah ngagai bala kuntrektor,” ku iya nengah siti penerang seharitu.

Tajapia, Uggah ngarapka ijinsi perintah baka ke Opis Kereja Raya(PWD), Opis Parit enggau Entali Ai(DID), Opis Residen enggau Pelilih Menua sereta opis bukai ulih mantau semua projek maya projek berengkah digaga baru.

“Atur tu deka nentuka bala kuntrektor ulih ngelengkaska agi kereja sida ketegal mayuh hari udah dipebasau maya PKP. Semua projek tu chukup beguna ungkup rayat,” ku iya.


Kena Hari Satu(Jun 22), Uggah ke mega ADUN Bukit Saban bisi ngadu aum begulai enggau pengari ari mayuh bengkah opis perintah di Betong alai sida bejuraika status Projek Transformasi Menua Pesisir(RTP) di pelilih nya.

Iya dipadah diak sekeda projek bisi tejanggal ketegal PKP ti diterit berengkah 18 Mac 2020.

Bela ngulu aum ADUN Layar Gerald Rentap Jabu, Sekretari Politik Kepala Menteri Richard Rapu enggau Residen Betong Friday Belik.—DayakDaily