Uggah: Konsep stesyen betanam betupi dipansik baru

Uggah nerima pemeri ari pemesai Opis Betanam Betupi Bintulu Anggang Jimbun ba penemuai kereja nya.

KUCHING, 13 Julai: Konsep stesyen pengawa betanam betupi di negeri tu deka dipansik baru, ku Sapit Kepala Menteri Datuk Amar Douglas Uggah Embas.

Uggah ke mega Menteri Betanam Betupi Moden, Tanah Adat enggau Pemansang Menua madah atur nya dikena nentuka stesyen pengawa betanam betupi di selampur menua mengkang relevan.

Ku iya, pekara nya mega seraris enggau kuing Perintah Negeri ti deka nguna chara moden ba sektor nya.

“Diatu, pemesai stesyen pengawa betanam betupi meseti enda kurang ari 40 hektar. Kitai dekaka semua stesyen ngembuan chukup tanah endur mandangka chara betanam betupi moden,” ku iya.

Uggah mansutka jaku nya ba penemuai kereja ke Palan Latih Betanam Betupi Sg. Sebiew di Bintulu kemari.

Ngenang kaul ke sama, iya madah opis menteri diatu merambu nambah kapasiti pengelandik ba mayuh bengkah pengawa baka ke betanam sereta ngintu pun rian.

Iya mega madah opis menteri deka bejalaika pansik ba program pengawa betanam betupi ke bisi disedia.

“Ba runding aku program tu mengkang relevan, ngiri penau enggau ajar sereta nyendia latih ngagai orang bekebun kitai.

“Program tu baka ke udah tinggal ba maya ke diatu alai ba menua ti ngemeranka pengawa betanam betupi moden baka ke Thailand enggau Taiwan, stesyen pengawa betanam betupi sida mengkang beguna,” ku iya.

Sebedau tu ku Uggah nambah, orang bekebun semina ngemansutka asil ti chukup ungkup sida empu aja alai diatu perintah meratka pengawa betanam betupi komersyel chara moden.

“Kitai deka ngangkatka orang bekebun mit. Kitai dekaka sida nanam tauka nupi mayuh agi, awakka asil sida ulih dijual ke menua luar lalu ukai semina meli aja.

“Enti sida ulih ngemansutka asil ti mayuh, udah tentu nya deka nambah penatai pemisi sida,” ku Uggah.

Bela datai Menteri Utiliti ke mega ADUN Kemena Datuk Seri Dr Stephen Rundi Utom, Menteri Muda Undang-Undang enggau Adat Bumiputera Datuk John Sikei Tayai (ADUN Kakus), ADUN Samalaju Majang Ringgie sereta ADUN Murum Kennedy Chukpai.-DayakDaily.

Share this article!