Dikarang Chris Bishop
SIBU, Mei 16: Kaunsil Penyerakup enggau Pengintu Tanah Sarawak (Salcra) ngiga sekeda raban penyereta skim nanam pun sawit ti patut nerima dividen.
Sapit Kepala Menteri Datuk Amar Douglas Uggah Embas madah dividen penyampau RM10 juta mengkang dipegai Salcra diatu alai duit nya patut diberi ngagai penyereta skim.
“Dividen penyampau RM10 juta mengkang dipegai Salcra ketegal ti enda nemu dini penunga orang bempu tanah.
“Kitai mega udah meresa akaun sida, tang mengkang chara nya enda tetemuka tunga sida,” ku Uggah.
Iya mansutka penerang nya lebuh dikerandau pemberita ba penemuai kereja ngagai Rumah Joseph Serang, Skim Sekuau di Sibu ditu, seharitu.
Sebedau niki ke rumah panjai, Uggah ke mega Menteri Betanam Betupi Moden, Tanah Adat enggau Pemansang Kandang Menua dulu ngemujur Pengawa Manggol Projek Kebun Sawit Sekuau.
Berindik enggau nya ku Uggah ke mega Chairman Salcra, sida minta saup ari raban ketuai komuniti enggau pengari rayat ba tetiap sitak kunsil negeri ke bekaul.
“Duit dividen tu sigi enggi sida (penyereta skim Salcra) alai kitai keran nyuaka duit nya enggau lengkas.
“Enti sida nemu diri bisi syer lalu enda nerima dividen tang penyereta bukai udah nerima, sida patut datai ngagai opis Salcra enggau lengkas,” ku iya nambah.
Nitihka penerang Uggah, kenyau ditumbuhka ba taun 1976, Salcra udah mayar dividen penyampau RM1 bilion ngagai bala penyereta skim. — DayakDaily
