KUCHING,17 FEB: Penyampau 98 buah rumah panjai mengkang diteritkan Perintah Tagang Pemindah tauka lockdown kenyau pandemik Covid-19 ditemu ngelekai dalam komuniti.
Sapit Kepala Menteri Datuk Amar Douglas Uggah Embas madah, sebedau tu perintah udah diteritkan ba 214 buah rumah panjai alai 116 buah rumah panjai udah diketuka perintah.
“Kenyau pandemik Covid-19 ditemu di rumah panjai, Komiti Pengintu Penusah Ngenyit Negeri Sarawak(JPBNS) udah neritka perintah ‘lockdown’ ba 214 buah rumah panjai.
“Ari penyampau nya, 98 buah rumah panjai mengkang diteritkan perintah lockdown,”ku Uggah ngambi riput Unit Komunikasi Awam Sarawak(UKAS).
Iya mansutka jaku nya nengah aplikasyen zoom begulai enggau Chairman Majlis Perbandaran Sibu (MPS) Clarence Ting.
Bela ngulu aum Chairman Majlis Luar Bandar Sibu (MDLBS) Sempurai Petrus Ngelai, Senator Robert Lau sereta Chairman Kesatuan Kebangsaan Dayak Sarawak (SDNU) pampang Sibu Chambai Lindong.
Uggah ke mega Chairman JPBNS nambah, peresa Covid-19 bela diadu ba tetiap peranak rumah panjai alai iya mega meransang sida ngambika seruran kering maya napi perintah lockdown diatu.
“Aku minta peranak rumah panjai diau di bilik diri tajapan enda mudah ba kitai enda pansut dalam timpuh 14 hari.
“Tang ba maya diatu, kitai meseti mendingka perintah ngambika ulih mantu mutuska pengelekai Covid-19,”ku Uggah.-DayakDaily
