Tusun Ke 4 — Karam di Darat, penusah ke majak nyadi sereta balat ngirau

Konsep baru rumah panjai tradisyenal, ke disikap enggau penyeliah penusah angus ti dikemendar Perintah Negeri.

“This article is a translation of Longhouse fires in Sarawak, a growing concern – Part 4 originally published on December 28, 2018.”

Translation by Chris Bishop

BA TUSUN Keterubah “Karam di Darat, penusah ke majak nyadi sereta balat ngirau”, DayakDaily bejuraika kes penusah angus rumah panjai ke majak nambah dalam timpuh tiga taun sereta pemerinsa ke ditapi mansa angus.

Ba Tusun Kedua, DayakDaily bekunsi penemu enggau idea raban pemesai “senior” ari Opis Bomba sentang chara ke ulih dikena nyeliah penusah karam di darat.

Ungkup Tusun Ketiga, kebuah penusah tu nyadi dalam timpuh tiga taun enggau bengkah pengawa tauka program ti udah diatur dikena nerenak pemereti sentang pengelikun bekenaka api ba nembiak enggau mensia mayuh dipejurai.

Serak tu ba Tusun Keempat, DayakDaily bejuraika Konsep Baru Rumah Panjai.

Konsep baru rumah panjai

Ari pemayuh program ke udah ditusun dikena nyeliah penusah angus rumah panjai, Bomba mega bisi ngenukuka konsep baru rumah panjai tradisyenal ti disikap enggau penyeliah penusah angus ti udah nerima sukung Perintah Negeri.

Ketuai Bomba Miri Law Poh Kiong nerang diak struktur begunan nengah konsep baru tu bepelasarka seni tradisyenal enggau main asal komuniti Dayak, baka ruai ke meseti bisi ba tetiap rumah panjai.

Iya madah kandang ngelingi deka digaga parit, jalai enggau dinding pemagi api. Tu nyendia pengelantang ngagai sida ke diau di rumah panjai.

Konsep baru rumah panjai tradisyenal, ke disikap enggau penyeliah penusah angus ti dikemendar Perintah Negeri.

 

Rumah Collin Sait di Bukit Peninjau, Bakong di Miri

Beambika chunto Rumah Collin Sait, ti nempa sejarah ba taun 2017 nyadi rumah panjai Iban keterubah digaga nitihka pelin konsep baru.

Projek pemungkal ari Opis Menteri Pengawa Berumah enggau Kunsil Kandang Menua tu dikemujur nengah Skim Rumah Panjang Mesra Rakyat.

Didirika urung 40km ari Mengeri Miri, rumah tu nyadi rumah panjai moden keterubah ke disikap enggau penyeliah penusah angus, struktur ngenanka main asal sereta seni Dayak nyengkaum insuran.

Pelin digaga siku arkitek bansa Iban alai rumah panjai moden tu digaga nitihka gaya tradisyenal rumah panjai Iban.

Disedia enggau insuran, orang bempu tetiap bilik udah tentu enda bangat irau enti penusah bisi nyadi, sida sereta ruang bilik diintu insuran.

Siti kompeni insuran, Allianz Malaysia nyendia pelin insuran ke dikumbai “Allianz KampungKu” ti ulih dibeli. Insuran tu ungkup rumah ke digaga ari kayu lalu ngintu ari penusah angus, ampuh bah sereta ribut.

Pelin Insuran – Allianz KampungKu.

Ngenang kaul ke sama, ketegal tetiap bilik bisi surat bempu ke sah nengah surat tanah sesiku ke diberi, tu mega mai reti sida orang keterubah nyadi orang bempu rumah panjai ke sah.

Ari nya sida ulih minta lun bank lalu tu meh dikedeka sida. Lun tau dikena ngaga rumah lalu tau mega dikena ungkup tuju bukai baka ke ba pekara pelajar anak sida.

 

 

Nyukung konsep baru

Tan Sri Dr James Jemut Masing

Meretika pemerinsa mansa ke dituntung penusah angus, Sapit Kepala Menteri Tan Sri Dr James Jemut Masing seruran meri sukung ba pengawa ngurangka penusah angus rumah panjai.

“Rumah panjai Dayak nyadi mansa penusah angus ninting taun. Enti rumah panjai angus, semua bilik rebah ke tanah, diempa api. Semua reta, pesaka lama nadai agi lalu pengerugi tau manggai beribu nyentuk ngagai bejuta ringgit.”

Setujuka perambu Bomba, Masing madah semua pelin rumah panjai meseti diubah, Ketuai Dayak meseti berandau lalu mutarka isu tu enggau berat ketegal chara baru dikena nirika rumah panjai meseti disedia.

Iya madah Perintah Negeri udah ngaga pelin baru ungkup struktur rumah panjai di Palan Pengentap Pendiau Sungai Asap di Belaga.

“Rumah panjai di Sungai Asap digaga baka blok ke enda ngelui ari 15 bilik alai dinding pemagi digaga 20 kaki ari tetiap blok. Ketegal tu, mayuh rumah panjai tauka blok di Sungai Asap enda angus enti penusah bisi nyadi,” ku iya.

Meretika penusah angus suah nyadi ari sambung wayar lektrik enggau pengilap di dapur, Masing madah bekal lektrik enggau tung gis pekara ke baru ba rumah panjai ketegal ngelama ke udah sida enda kala ngena utai tu.

“Chukup berat ungkup kitai meri pelajar ngagai sida sentang chara ke betul nguna bekal lektrik enggau tung gis,” ku iya.

Pengarap enggau Peransang

Bechuntoka Rumah Collin Sait enggau Palan Pengentap Pendiau Sungai Asap, dikearap peranak rumah panjai kelebih agi tuai rumah ulih nerima sereta nyukung konsep baru tu.

Ketuai ba tetiap rumah panjai meseti nentuka bala anakbiak iya diperabung enggau manah sereta seruran likun.

Munyika ditusui ba Tusun Kedua kenang tu, Ordinan Begunan Sarawak (SBO) nadai netapka rumah panjai meseti bisi bengkah pekara penyeliah penusah.

Berindik enggau nya, dilempaika ngagai Perintah Negeri ngaga ubah ba sentang undang-undang tu.

Ngubah runding rayat ti udah ngasaika pengelantang ba pengidup ukai pekara ke mudah, tang ubah tu meseti digaga.

Sekeda orang engka deka ngemelika pelin tu, tang sida tentu deka setuju enti pelin tu nempa pemujur. — DayakDaily

Antika Tusun Kelima udah tu