SIBU, Jan 29: Tim tambah deka ditumbuh ngambika ulih lengkas nangkap ukui siga nyema bisi nerima kangau ari mensia mayuh, dikena nagang pengelekai virus rabies lalu ngambika Bagi Menua Sibu beresi ari penyakit nya.
Menteri Muda Pengawa Berumah enggau Pengerai Mensia Mayuh Dr Annuar Rapaee madah, tim nya deka dipinta semampai sedia belama sereta nerima kangau ari mensia mayuh nengah lumur ‘hotline’ ngambika nangkap ukui siga nya.
“Tu dikena nambahka pengarap ati mensia mayuh ti mandangka perintah bebendar deka nagang rabies.
“Kitai enggai meda nyema mensia mayuh ngaga kangau tauka besebana, dua ngagai tiga hari udah nya baru bisi respon. Tu enda manah,” ku iya
Iya bejaku munyi nya ba pengerami makai lemai begulai enggau raban Tim Nagang Rabies ditu malam ensana.
Dr Annuar ke mega nguluka Tim Nagang Rabies madah, tim nya diseretai raban pengereja pengawa ari Opis Veterinar, Majlis Perbandaran Sibu, Majlis Luar Bandar Sibu enggau Majlis Daerah Kanowit.
Ku iya, program meri vaksin anti rabies ngagai ukui nengah chara ke besai diatu nagit 70 peratus ukui di bagi menua nya.
“Kita bebendar ngelaban rabies ari ngelekai di bagi menua Sibu. Tu beguna amat ngambika pengelekai rabies ulih ditagang tama ke bagi menua Bintulu, Miri nyengkaum utara Sarawak,” ku iya.
Ku iya baru, naka ke diatu 1,171 ukai udah diberi vaksinasi kenyau ari program vaksinasi anti rabies berengkah 20 Jan tu tadi, lalu ditimpuh tembu kena 1 Mac nengah pengawa muka 29 pusat vaksinasi.
Berebak enggau nya, Ketuai Pengerai Mensia Mayuh Opis Menteri Kaunsil Kandang Menua enggau Pengawa Berumah, Dr Cheong Yaw Liang madahka semilan sampel udah dianjung ngagai Institut Mansik Veterinar di Ipoh, Perak ngambika dianaliss.
Pemutus peresa ba sampel nya deka ditemu dalam timpuh tiga minggu, ku iya. — DayakDaily
