Tikas pengelaju, bayar Internet pekara ti dikemerat KKMM

Digital devices and data. — DayakDaily.com file pic. // Photo: Pixabay

KUALA PILAH, Julai 8: Tikas pengelaju enggau bayar Internet entara pekara besai ti dikemerat Opis Menteri Komunikasi enggau Multimedia (KKMM), dalam visi opis nya nyadika komuniti di menua tu seruran bepenemu sereta ngembuan penerang ke betul sereta laju sentang sekeda isu.

Sapit Menteri KKMM Eddin Syazlee Shith madah, rayat meseti diberi naka ulih penerang ke betul sereta enda bechiping enggau mayuh ngambika sida sama ngaul diri dalam projek pemansang menua.

“Tu (Internet) iya nya penanggul ke pemadu besai dalam telekomunikasi lalu nengah sekeda randau seret pejurai enggau menteri opis tu (Gobind Singh Deo), endang tu mih ke nyadi fokus opis menteri nya lalu deka diperunding begulai enggau piak telekomunikasi ngambika ulih nyeruri sereta ngemanah perengkaguna Internet ke endang udah bisi.

“Paling manah enti ikas bayar internet tu nyadi pekara keterubah ke patut dipansik ngambika kitai ulih meransang sereta narit mayuh agi rayat ngena perengkaguna Internet dikena ngulihka input enggau penerang ke betul,” ku iya lebuh dikerandau bedau lama.

Kaban Parlimen (MP) Kuala Pilah nya madah, KKMM mega deka neruska pilisi lama ke dipeda ulih meri pemaik ngagai rayat baka Palan Internet 1Malaysia nengah pengawa ngangkatmanah kualiti servis nya.


“Tajapan perengkaguna nya udah bisi, tang kitai suah nerima sebana iya nya perengkaguna tu enda baka ke dikearapka rayat.

“Nya mih entara pengawa ngangkatmanah ke deka digaga KKMM dikena nentuka serikat telekomunikasi ulih nyendiaka perengkaguna ke engkeman lalu enti ulih ungkup rayat ngambika batang tuju enggau visi ke dekaka rayat seruran bisi penerang ke baru ulih dijapai enggau manah,” ku iya.

Eddin Syazlee ke baru ngemunka pengawa iya Hari Dua nyin tadi, mega sama bekunsi madahka perintah patut mayuh agi ngaha pengawa ngelaku ekonomi digital dikena muka mayuh agi awak ke bekait enggau ekonomi digital baka dagang online ngagai rayat.

Ba kenang sentang Pertubuhan Berita Nasional (Bernama), iya madahka pengawa ngempung ke diperambu entara ejensi nya enggau Radio Televisyen Malaysia (RTM) dipeda bisi pematut enggau pemintaguna komuniti kemaya hari.

“Bernama udah ditemu siti ejensi ke meri penerang ti ngembuan pemerat ti betul lalu ulih dipechaya, nya alai aku pechaya tu entara tegal lapa perintah patut dalam proses deka ngempungka Bernama enggai RTM,” ku iya.

Eddin Syazlee madah nya agi ba renggat pansik, tang ngarapka pekara nya ulih dilengkaska agi ngambi rayat ulih nerima pemaik ari nya. — DayakDaily