KUCHING, Dis 20: Parti Bansa Dayak Sarawak Baru (PBDSB) mantaika 3 nama chalun ngarika parti ba pengawa bepilih negeri ti deka diatur sebarang maya berengkah taun baru.
Ketetiga chalon potensyel PBDSB iya nya Nicholas Mujah di Sitak Kunsil Negeri (DUN) Balai Ringin, Nikodemus Singgai di DUN Gedong enggau Rapelson Richard Hamit di DUN Simunjan.
Pekara tu diputuska Presiden PBDSB Cobbold John nengah surat penerang berita ke dipansut sehari tu.
“PBDSB ungkup semua Dayak enda ngira batang pengarap enggau bansa.
“Kitai ngelaluka semua bansa Dayak ti ngembuan rikut beresi nyereta PBDSB alai nya nyengkaum sida ari Pakatan Harapan(PH) enggau Gabungan Parti Sarawak(GPS).
“Tajapia, sida meseti nadai kaul enggau ulah makai suap sereta isu tanah,”ku Cobbold.
Iya nambah, Dayak meseti begempung ngambi ulih nyagu PBDSB ngagai penuduk ke tinggi lalu ngintu hak peranak asal sereta Sarawak.
Ku iya, parti tu ukai empu aku siku tang ungkup semua bansa Dayak.
“Sehari tu kitai mantaika sekeda nama chalun potensyel parti dikena ngeringka kandang endur (DUN) ke berimbai.
“Rapelson ba Simunjan, Nikodemus (Gedong) enggau Nicholas (Balai Ringin). Sida tiga dikelala nyadi aktivis ba hak tanah enggau sosial lalu udah lama ngadu pengawa negika hak peranak asal kelebih agi ba isu tanah,”ku Cobbold nandu.
Rapelson kala nyadi chalun di Gedong lalu ngenanka deposit alai serak tu iya nyerahka sitak nya ngagai Nekodemus ke asal ari Spaoh, Gedong.
Ba sentang Mujah ke mengkang kaban dalam Parti Keadilan Rakyat (PKR), Cobbold pechaya aktivis hak tanah enggau pengenan hak peranak asal nya deka nyereta PBDSB.
“Munyika jaku aku, parti tu ukai empu aku siku tang ungkup semua bansa Dayak. Nadai salah, iya(Mujah) orang Dayak tau nyereta PBDSB lalu nyadi chalun ngarika Dayak enggau Sarawak.
“Mujah enda ibuh nganti surat chiri nyadi chalun ari Putrajaya. Kami ulih meri iya semua nya asal iya nitihka 18 kriteria chalun PBDSB.
“Ketetiga sida, Mujah, Rapelson enggau Nikodemus nitihka 18 kriteria nya,” tandu Cobbold.
Iya nambah pemutus nyiri sida tiga nya digaga bepelasarka pinta enggau peneka ba tetiap sitak kunsil alai pansik nya udah digaga. — DayakDaily
