KUALA LUMPUR, Sept 2: Riput ke penudi tiga batang isu ke bekaul Opis Menteri Pengerai (KKM) deka dipejuraika ba aum Kabinet ke deka datai, pia Menteri opis nya Dr Dzulkefly Ahmad.
Tiga riput nya bekaul nusun baru semula Klinik 1Malaysia, kes ngachai asi sukur seksual ke ngaul Pemesai Perubat Siswazah (PPS) enggau perambu nikika penyampau chaj perunding pengemeran perubat enggau lutur ba servis di klinik enggau sepital peribit.
Dr Dzulkefly madah, bepelasarka perambu bisi 33 ari 346 Klinik 1Malaysia di serata menua deka ditutup nengah chara berenggat pengudah isu nya dibai ke Kabinet.
“Laluh Klinik 1Malaysia nya deka diubah nyadi Klinik Komuniti ke bisi benerapa ubah baru nyengkaum ngengkahka pemesai perubat, raban farmasi enggau indi misi ba tetiap klinik,” ku iya madah ngagai pemberita pengudah bejadi Minggu Promosi Pengerai Ngeli Renggat Menua (Minggu PKPK) 2018, di Dataran Dewan Bandaraya Kuala Lumpur, kemari.
Ku iya, pemutus nutup 33 klinik nya enda ngachau servis pengerai dikenataika ngagai peranak ngelingi laban bisi fasiliti perubat KKM ke besemak (Sepital dan Klinik Pengerai). — DayakDaily
