Terangka silik projek ngangkatmanah ‘Wireless Walk’ — Dr Teo

Digital devices and data. — DayakDaily.com file pic. // Photo: Pixabay

MIRI, Julai 19: Perintah negeri meseti madahka silik sentang pengawa ngangkatmanah projek ‘Wireless Walk’ ke beungkus RM3.36 juta dikena nentuka projek nya enda ngachau imej dagang temuai Bandaraya Miri enti udah tembu endar ila.

Kaban Parlimen Miri Dr Michael Teo Yung Keng madahka Opis Menteri Dagang Temuai, Seni, Main Asal, Nembiak Lumba enggau Main negeri enda patut berumban nembuka projek sebedau nerima timbal ari orang ke bisi pemerat ba pekara nya sereta mutarka sekeda isu ti dikenataika mensia mayuh ngagai iya.

“Isu-isu nya baka pemeresi, penyekut jalai, pengelikun orang ti bedarat, mutarka ai ke kamah ke udah dikena enggau ampuh bah ngenyit di sepemanjai jalai,” ku iya ba sebengkah penerang ditu sehari tu tadi.

Dr Teo ngenadaika sebaa sekeda orang ti saru enggau penerang media iya minggu nyin tadi ti kenu ku madahka iya minta perintah negeri nginsil projek nya.

“Nya enda amat, kami semina minta berandauka pekara tu enggau lurus sereta tebuka dikena mandang ngagai mensia mayuh ke alai semua pansik bekaul udah dipejalai lalu pengawa ngangkatmanah enda nyadi siti agi projek ke masau belanja,” ku iya. — DayakDaily