Tentuka Sarawak enda lenyau kuasa pengudah PRN12 — Dr Hazland

Dr Hazland (kanan) ngembing Dr Abdul Rahman (kiba) tama ke dalam balai besai PCC Demak di Kuching.
IBRACO WEBSITEI

Dikarang Chris Bishop

KUCHING, Mei 5: Kaban Kunsil Negeri (ADUN) Demak Laut Dr Hazland Abang Hipni ngelalau semua rayat ngambika bela besaup nentuka Sarawak enda lenyau kuasa pengudah Pengawa Bepilih Negeri Ke-12 (PRN12) ti deka datai.

Bejaku rambau Licha MA63 Renggat Parlimen Santubong seharitu, iya madah Perintah Negeri nengah Gabungan Parti Sarawak (GPS) keran ngulihka hak enggau kuasa Sarawak ke disetuju dalam Sempekat Malaysia 1963 (MA63) diberi pulai.

“Enti kitai enda mujur ba pengawa bepilih negeri ke deka datai, abis undang-undang kitai dikinsil.

“Tu nyengkaum MA63, Ordinan Minyak enggau Ngelombong 1958 (OMO58) sereta semua undang-undang ke bekait enggau hak Sarawak,” ku iya ba licha ke diatur di Palan Aum Penview (PCC) Demak ditu.

Licha dipenyadi Menteri Muda Bekal Lekterik Menua Pesisir Dr Abdul Rahman Junaidi.

Dikena ngemujur juluk nya ku Hazland nambah, Perintah Negeri udah numbuhka sekeda komiti ti deka nyaup negika hak-hak enggau kuasa Sarawak dalam MA63.

Entara ke udah ditumbuh ku iya, Komiti ‘Bertindak Kerajaan Negeri’ ti betuaika kepala menteri serta bela matak menteri undang-undang, luya negeri enggau raban orang ke landik ba pekara undang-undang.

“Kitai mega udah numbuhka komiti teknikel enggau komiti bukai ti deka berunding enggau Perintah Besai,” ku Dr Hazland.

Jamilah bejaku ba Licha MA63 Renggat Parlimen Santubong.

Ba pengawa ke sama, ADUN Tanjung Datu, Datuk Amar Jamilah Anu bela ngelalau rayat negeri tu meri sukung ke tegap ngagai GPS.

Ku iya, rayat negeri tu nadai tanah bukai kelimpah ari tanah Sarawak.

“Sapa ke lebih landik ngintu pemaik Sarawak enti enda orang Sarawak empu.

“Kitai enggai orang ari negeri bukai nentuka kuing enggau nasit Sarawak,” ku Jamilah. — DayakDaily