SIBU, April 27: Ketuai raban bansa enggau ketuai etnik ti nyadi ketuai ba renggat baruh di negeri tu dipinta bejalaika tanggungpengawa nentuka bala nembiak ke dipegai sida nemu bemacham bengkah polisi enggau program perintah.
Sapit Kepala Menteri Datuk Amar Douglas Uggah Embas madah, nya ngambika juluk Sarawak nyadi negeri maju bepenatai pemisi tinggi nyerumba taun 2030 ulih dijapai.
Ku iya, bala ketuai ba renggat dikearapka nyaup ngerembaika pemansangu ekonomi Sarawak, kelebih adi ba kandang menua ke jauh di ulu entigis.
“Tentuka bala nembiak redak polisi sereta program perintah ke balat nyukung ngambika tetiap iku rayat Malaysia, kelebih agi di Sarawak ngasaika gelumbang transformasi ti lalu mai ngagai menua maju sereta bepenatai pemisi tinggi,” ku iya.
Teks jaku iya dibacha Menteri Muda Pelajar enggau Pansik Teknologi, Dr Annuar Rapaee ba pengerami nangguh Seminar Pemansang enggau nyadi Ketuai Raban Bansa enggau Ketuai Etnik Renggat Negeri Sarawak 2018 (bagi Sibu, Mukah enggau Kapit) ditu kemari.
Ku Uggah, ari baruh pegai Kepala Menteri Datuk Patinggi Abang Johari Tun Openg mayuh pemujur dijapai baka ngelancharka Petroleum Sarawak Berhad (Petros), DBOS (Bank Pemansang Sarawak), aplikasi Sarawak Government enggau SarawakPay, bejadi TEGAS Digital Innovation Hub, Sarikei Innovation Centre enggau Sarawak Multimedia Authority.
“Semua tu nyengkaum pelin ngaga sistem grid ai, sistem Transit Aliran Ringan (LRT), Skim Elektrifikasi Menua Pesisir Alternatif Sarawak (SARES) enggau bemacham agi, beguna amat ke pemansang negeri Sarawak nyadi negeri bepenatai pemisi tinggi nyerumba taun 2030,” ku iya.
Ku iya, rayat patut meri sukung penuh ngagai Abang Johari ke deka mai ubah ba pemansang Sarawak ngagai tikas ti tau ngemegahka rayat diatu enggau rebak dudi. — DayakDaily
