Rita, PRS nempa sejarah nyema menang ba Selangau

Masing disambut mensia mayuh lebuh ke datai ngelanchar Tim Pengawa Bepilih BN Selangau.

SELANGAU, April 27: Pengundi ditu deka nempa sejarah nyema sida ngundi chalun BN ba sitak Selangau Rita Insol, pia ku presiden Parti Rakyat Sarawak (PRS), Tan Sri Dr James Masing.

Ku Masing, iya patut menang lalu iya deka nyadi indu Iban tauka Dayak keterubah nyadi pengari rayat ba perintah besai.

“Sejarah tu ukai semina diempu Rita tang mega parti nyengkaum peranak di Selangau.

“Ari pemayuh parti politik di Sarawak enggau di Malaysia, nadai siti pan parti bisi nudukka chalun indu Iban tauka Dayak ba pengawa bepilih tu.

“Nya kebuah kitai meseti ngambi peluang ti nempa sejarah, ku iya lebuh bejadi Tim Pengawa Bepilih BN ba Rumah William Bansa di Dijih ditu, tadi.

Sekeda ari mensia mayuh ke bisi ngulu pengerami nya.

Ku iya, Rita peranak asal menua nya lalu iya sigi patut. Iya mega madah, parti nemu dia mayuh agi pengundi indu ari lelaki.

Ngenang pasal chalun Parti Keadilan Rakyat, Baru Bian, Peranak di Selangau deka nyadi nadai rega enti nejuka orang ari luar menang ba sitak nya.

“Enti sida madahka chalun nya luyar, Rita pan luyar lalu semua chalun kitai bepelajar,” ku iya.

Sama bisi ba pengerami nya Ketuai Indu PRS Senator Datuk Doris Brodie, ADUN Belaga Liwan Lagang, ADUN Tamin Christopher Gira, Ketuai Nembiak PRS Datuk Snowdan Lawan, ADUN Pelagus Wilson Nyabong, ADUN Kakus Datuk John Sikei, ADUN Samalaju Majang Renggi, ex-ADUN Tamin Datuk Joseph Mauh enggau Sekretari Kepala Menteri, Edwin Banta. — DayakDaily