Tekad Ai Bakun ‘serega’ ngagai orang ti rinduka pengawa nginti

Bakun HEP Dam - file pic

BELAGA, September 15: Bulih ikan empurau, bansa ikan ai sungai ke pemadu mar di negeri tu nyadi juluk ati tetiap iku orang ke nginti kelebih agi di Sarawak, lalu aktiviti ngelantangka diri seraya nginti ikan nya ulih digaga ba tekat ai Bakun.

Pengemeran Bakun Paradise Romio Ding, ti ngerintis aktiviti ba tekad ai ke mesai menua Singapura nya, madahka agi mayuh anak sungai enggau lubuk ikan belum ditegu dia.

Tekat Ai Bakun nyadi asil ari pengawa ngaga Stesyen Hidroelektrik (HEP) Bakun, ke ngembuan pemesai urung 695 kilometer persegi, sereta nyadi letung ai ke pemadu besai di menua tu.

“Kami udah mai mayuh gerup orang ke nginti datai nguji nasit ditu, ukai orang ke rindu nginti ari negeri tu tang aja mega ari Semenanjung, Singapura enggau Jepun.

“Bisi mayuh bansa ikan ba Tekat Ai Bakun baka empurau, sebarau, semah, baung enggau ikan bukai lalu asil ke diulih nginti bapanggai ba chara ke dikena orang ke nginti nya,” ku iya.

Ku Romio, rega ikan empurau ulih manggai ngagai entara RM700 nyentuk RM1,200 sekilogram ti nyadi batang pematak orang datai nginti kitu kelimpah bansa ikan bukai. Taja pia, ukai mudah bulih ikan empurau nya.

“Bepelasarka peneleba kami bisi beberapa bansa ikan empurau ba Tekat Ai Bakun baka empurau putih enggau empurau mirah. Empurau Putih ke bisi ditu bebida ari ikan empurau ba endur bukai,” ku iya ke baru udah mujur bulih siku ikan empurau putih bedau lama udah.

Iya mega madah, tebal agi orang ke datai nginti kitu ngemeranka konsep tangkap enggau lepas.

“Nyauka semua orang ke nginti datai kitu pulai mai kenang sida ditu. Sigi rindu nguji ngulihka bemancham bansa ikan ke bisi ditu,” ku iya.

Mensia mayuh ke deka ngasaika diri empu pengerindu nginti bemacham bansa ikan ba Tekat Ai Bakun ini, tau meda penerang silik ba Facebook Bakun Paradise. — DayakDaily