SERIAN, Mac 19: Tabung Ekonomi Gagasan Anak Bumiputera Sarawak (Tegas) diatu benung ngaga pemandang di serata negeri ti ngelui dua minggu ke udah dikena matak pengerindu nembiak ke udah abis besekula ti mengkang kelabur sentang kuing sida.
Sapit chairman Tegas, Datuk Dr Jerip Susil madahka pemandang nya diatur nyengkaum ba pasar mit di menua pesisir ngambika bala nembiak ulih datai sereta beratika kus enggau duit jali dikena belajar tauka skolarsip ari 45 buah institusi pelajar ke nyereta pemandang nya.
Ku iya, pemandang nya diatur ba maya ke patut setipak enggau pemutus peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM) ke baru dikeluarka, lalu ngambika nembiak ti udah nembuka pelajar ulih ngaga pemutus ke betul milih batang pengawa ke pemaik pengidup sida jemah ila.
“Kami nemu pengudah Form 5 enggau Form 6, mayuh bala nembiak enda nemu kuing diri. Nya alai, nengah penemu tu ngambika sida nemu kuing diri pengudah ngambi peresa, sida meseti beratika kuing pengidup diri, nama utai dikerindu enggau kini deka dituju sida. Nya beguna amat diatu.
“Semua sistem pelajar kitai ukai semina pasal ngambi oeresa aja, tang nyendiaka diri ke pengidup dudi harj ila lalu kami diatu nyikap sida ngena pengidup, nengah pengerindu ke setipak enggau pengelandik ti dikedekaka sida.
“Ke beguna amat sida bisi kereja lalu ngaul diri ba pekara ti dikerindu. Diatu, pekereja ke landik mayuh digaji lalu sida lantang pengidup dibayar gaji ke besai. Nya siti arj pilih lalu sida patut serius berundingka nya,” ku iya madah ngagai pemberita udah bekau bejadika Pemandang Karier enggau Pelajar Tegas’ ke diberi naa ‘Project of Dreams Realised’ (PRO-DR) di Dewan Komuniti Serian kemari.
Ba jaku iya ke dulu ari nya, Dr Jerip ti mega Menteri Muda Perengka Pengangkut, nekanka sentang pemesai reti nembiak ke udah tembu besekula sentang oemesai reti milih kus ke betul dikena nentuka sida bisi pengidup ke meruan jemah ila.
Laban perintah negeri diatu beratka ekonomi digital dikena ngubah Sarawak, lalu iya ngelalau nembiak nyikap diri ngena pengelandik baru enggau penemu ke engkeman enggau dunya diatu.
“Ekonomi digital dipelaba ngangkatka 17.4 peratus GDP nyerumba taun 2025. Nya alai, bala nembiak endang patt endar nyikap dir ngena pengelandik ke engkeman lal nyadi sebagi ari tranformasi ekonomi,” ku iya.
Iya meri terima kasih ngagai instuti ti nyereta program nya ke diatur di serata Sarawak, laban nya ukai mudah ketegal betapi enggau pemar logistik. — DayakDaily
