KUCHING, Dis 14: Betanam betupi nyadi sektor ke ulih ngerembai seagi teknologi moden dikemeranka raban ti ngereja bidang nya sekalika nengah chara besai tauka mit.
Kepala Menteri Datuk Patinggi Abang Johari Tun Openg madah, polisi perintah negeri diatu iya nya ngubah sektor betanam betupi ngambika pengemeran ba sektor nya kelebih agi peranak menua pesisir teulihka penatai pemisi ke besai nyerumba taun 2030.
“Ngambika ulih nyapai juluk negeri ke besai penatai pemisi manggai ba taun 2030, perintah udah nguna mayuh bengkah inisiatif enggau ekonomi digital ke ngasi ngambika seraka ekonomi menua pesisir enggau kandang nengeri ulih dikedut.
“Nguna teknologi moden, orang bumai bekebun ulih nambahka pemansut sida belipat mayuh agi ari chara lama,” ku iya lebuh bejaku ba pengerami Hari Pengereja Pengawa Perintah 2017 di BCCK pagi kemari.
Ku iya, orang ti betanam betupi mega ulih nyual asil sida nguna teknologi moden nengah e – dagang sereta ulih nambahka penatai pemisi sida.
“Nengah teknologi mega nemu palan alai betanam betupi sereta bulih penerang penyampau pemesai tanah ti dikerejaka sida.
“Nya alai perintah dekaka teknologi dikemeran dalam sektor nya lalu ngambika Sarawak ulih nyadi pemansut pemakai di menua tu tauka menua luar jemah ila,” ku iya. — DayakDaily
