PKS di Sarawak dikearap ulih besemekih nuju Industri 4.0

Business, jobs and trade. — DayakDaily.com file pic. // Photo: Pixabay

KUCHING, Dis 14: Menteri Muda Industri enggau Beranakka Puku, Malcolm Mussen Lamoh madahka dagang mit enggau jelan pemesai (PKS) di Sarawak bisi prospek ke manah besemekih nuju revolusi Industri 4.0.

Ku iya, penyampau PKS di Sarawak ngarika 6.7 peratus ari semua 907,065 PKS di Malaysia ke alai urung 61,000 dagang di Sarawak nya PKS.

“Bantu ari PKS di Malaysia nyengkaum Sarawak beguna amat dikena numbuhka peluang kereja sereta ngangkatka standard pengidup rayat Malaysia.

“Nya alai aku pechaya, PKS di Sarawak bisi prospek ke manah besemekih nuju Industri 4.0,” ku iya.

Ku iya lagi, ukai mudah PKS ngemeranka ubah Industri 4.0 kelebih agi enti kita bisi berasai nangi sereta irau ati sentang dini kita deka berengkah nuju industri nya.


“Industri 4.0 nya revolusi digital. Taja pia, pejalai ngemeranka industri nya sigi mar.

“PKS patut nanya sekalika proses digital nya deka meri pemar ngagai orang dagang lalu patut berati Industri 4.0 ti deka dipejalaika nya ari tiga aspek ke bebida,” ku iya.

Ku iya, tiga aspek ke bebida iya nya produktiviti dikena ngurangka ungkus semua sereta ngemanah tikas produktiviti, kualiti sereta ngurangka penyilap mensia lalu fleksibiliti nyendiaka fleksibiliti sereta mandakka timpuh nuju makit. — DayakDaily