KUCHING, Mac 14: Sarawak enggau Singapura udah setuju bekerejasama dalam bidang betanam betupi enggau dagang temuai, ku Kepala Menteri Sarawak Datuk Patinggi Abang Johari Tun Openg.
Abang Johari madahka iya enggau Menteri Besai Singapura Lee Hsien Loong udah berandauka pekara nya lebuh ke betemu di Singapura empai lama.
Ku iya, Sarawak deka muka opis di Singapura ngambika ulih mantu orang dagang di negeri tu ke ngembuan juluk deka ngaga kerejasama enggau orang dagang di menua nya. Ku Abang Johari, menteri Singapura ngakun potensi Sarawak enggau insiatif ekonomi digitalnya.
Kepala Menteri madahka iya udah minta sekretari negeri muka opis di Singapura ambis laun Januari taun baru.
Abang Johari madah munyi nya lebuh ke bejaku ba pengerami makai lemai beserimbai enggau Gempuru Besai Ke-14 Parti Pesaka Bumiputera Bersatu (PBB) di sebuah hotel ditu malam tadi.
Ku iya, opis nya ila deka nyadi strategik amat ke Sarawak dalam ASEAN.
Abang Johari mega madahka iya deka mantaika dua pekara iya nya ba bulan September enggau Oktober taun tu.
Taja pan enda mantaika nya silik, tang dipelabaka nya bekaul enggau undang-undang kreativiti ungkup raban biak lalu ba bulan Oktober nya bekaul enggau RM8 bilion dikena ngaga grid ai ke mekal ai ngagai serata Sarawak.
Sentang politik, Abang Johari madahka PBB meseti menang semua kerusi ke endur bediri minta pilih ba pengawa bepilih besai ke-14 ila.
Beliau minta pengundi Sarawak meri pemujur besai ngagai BN dikena malas pemeri ari Menteri Besai Datuk Seri Najib Tun Razak ngagai Sarawak baka ke ngelama tu. — DayakDaily
