MIRI, Mei 8: Direktor operasi pengawa bepilih SUPP, Datuk Lee Kim Shin ngelalau sekeda orang ti nguji ngamahka nama BN nengah media sosial, madahka ripot polis udah digaga bekaul pekara nya.
Bejaku ba aum pemberita kemari, Lee madah raban volenteer pengawa bepilih parti nya udah ditanya mensia mayuh pasal utai ti dibantai ba media sosial ti nuduh BN nyadung duit ke meri terima kasih.
“Aku deka ngenukuka ditu chara nya dikena penyukung penyakal ngamahka nama kami. Ke bendar, kami nadai kala nyadung duit ngagai mensia mayuh lalu utai ke dibantai nya semina dikena nempa senario ba maya ke diatu.
Lee mega madahka ba pengawa bepilih negeri dalam taun 2016, bisi orang nguji mejal kami ngena chara ke sama.
“Aku dipadahka bisi orang bediri ba mua poster aku lalu ngambi gambar mandang duit RM50 ke diambi iya ari kuchik baju.
“Udah nya iya lalu mantaika gambar nya ba media sosial madahka diri bulih duit nya ari aku.
“Pengudah ripot polis digaga ba orang nya, iya lalu madamka gambar ke dibantai nya, ke alai aku ngasaika iya pan bisi ngasaika diri salah,” ku Lee ke mega Menteri Muda Dagang Temuai, Art enggau Main Asal. — DayakDaily
