Penemuai Dr Rundi ke Kabong semina diambat urung 120 iku aja

Dato Sri Dr Stephen Rundi

KABONG, Mei 8: Penemuai Menteri Utiliti Sarawak, Dato Sri Dr Stephen Rundi Utom kia kemari semina diambat urung 120 iku aja di Dewan tebuka SJK (C) Chung Hua Kabong ditu.

Rundi ke diperambu datai pukul 2 ngalihari datai ba endur nya urung pukul 3.00 lemai.

Sama bisi ngulu program betemu rayat nya Residen Bagi Menua Betong, Friday Belik, D.O Kabong, Kamaludin Alkap enggau Pemesai Opis Bekal Ai Menua Pesisir (JBALB) Betong, Chang Kuet Shian.

Penemuai Rundi kia laban deka mendingka sebana peranak dia sentang penanggul sida kelebih agi penanggul bekal ai, kelimpah mantu chalun Barisan Nasional (BN).

Taja pia chalun BN , Subeng Anak Mula sama nadai dipeda ngambat penatai menteri nya.

Rundi lebuh ke bejaku madahka diri baru nemu pasal penanggul ai di Kabong dua minggu ke udah, pengudah iya ngabas loji meresi ai (lama) ditu kena April 19.

“Aku ngarika opis menteri minta ampun laban penusah ke ditapi kita lalu aku datai kith ketegal deka mantu kita.

“Aku deka ngasuh JBALB jampat mutarka penanggul bekal ai di Kabong,” ku iya.

Rundi mega bisi ngenang pasal perambu numbuhka Grid Ai Negeri ti deka dikena mutarka penanggul ai di negeri tu.

Ku iya, agih belanja dikena gemanahka bekal ai di Kabong bisi RM60 juta. Agih belanja nya disebut l Kepala Menteri maya Program Sejiwa Senada Saratok 2018 tu tadi dikena ngaga jalai ai kediri ngagai pelilih Kabong. Projek nya dikearap ulih dipejalaika ba awak ke semak. — DayakDaily