‘Sukung Jabu ngangkatka Jaku Iban’

Deputy Chief Minister Datuk Amar Douglas Uggah Embas

SIBU: Sapit Kepala Menteri Datuk Amar Douglas Uggah Embas, minta semua terus nyukung inisiatif ex-Sapit Kepala Menteri Datuk Patinggi Tan Sri Alfred Jabu Numpang ti deka ngangkatka jaku Iban nyadi subjek ke beguna diajar ba sekula sekondari.

Ba Uggah, ngangkatka jaku Iban ulih nyadika subjek nya dipelajar bansa bukai kelimpah ari bansa Iban empu, seraya muji pengawa dikereja Jabu ke mega Penyanding Penemu Pansik Sains ti dekaka jaku Iban diintu ungkup rebak dudi, sebaka enggau pengawa ngintu adat enggau main bansa Iban.

Iya bejaku munyi nya lebuh bejadi ‘Seminar Budaya Iban Siri 2’ ke diatur Institut Pematih Pengajar (IPG) Kampus Rajang, Gerempung Pemansang Pelajar Jaku Iban (AEDIL) enggau Serakup Indu Dayak Sarawak (SIDS) di Sibu, empa lama udah.

Uggah ke mega Menteri Betanam Betupi Moden, Tanah Adat enggau Pemansang Kandang Menua nentuka perintah deka berandau lalu mutarka penanggul bekaul enggau raban pengajar baka latih, bup referen enggau penyampau pengajar enggu opis ke bekaul.

Uggah ngarapka seminar nyadi pelasar endur berandauka pekara ngemansang jaku Iban dalam dunya ekonomi digital ke diatu kelimpah berati lalu nentuka bansa Iban enda tinggal ba pemansang pelajar enggau ekonomi ke diatu.