JKKK, JKKKP dilalau nyaup perintah meri pemadah ke betul

Datuk Alexander Nanta Linggi

MIRI: Perintah dekaka kaban Komiti Pemansang enggau Pengelikun Genturung Pendiau (JKKK) enggau Komiti Pemansang sereta Pengelikun Genturung Pendiau Perintah Besai (JKKKP) aktif agi meri pemadah ke betul bekaul enggau polisi perintah ngagai peranak menua diri.

Sapit Menteri Pemansang Menua Pesisir enggau Kandang Menua Datuk Alexander Nanta Linggi madah, nyadi pekara ti beguna amat ngagai ketuai ba renggat ke baruh meri pemadah ke betul sentang isu kemaya hari ngambika perintah Barisan Nasional (BN) enda betapi enggau pemar lalu nyadika main politik sekeda raban orang.

Ku iya sukung penuh bala ketuai baka penghulu enggau ketuai raban bansa ti nyadi raban JKKK enggau JKKKP beguna amat dikena nentuka juluk perintah ulih nyapai tagit menua maju ba taun 2020 sereta ngemujurka Transformasi Nasional menua.

“Tu beguna amat dikena nentuka semua agenda pemansang ti udah kitai perambu ulih dikemujur ke pemaik semua rayat,” ku iya lebuh bejadi ‘Program Sijil Tadbir Urus Desa Infra-UniKL’ ditu kemari.

Ku Nanta, ketuai ba renggat nembiak redak patut proaktif agi ngenepapka pengarap ati peranak genturung pendiau ngambika terus nyukung perintah BN ba pengawa bepilih besai ke-14 (PRU14) tu ila.


Ku iya nguna media baru siti ari chara ngemetulka perseptif negatif ba peranak genturung pendiau ti udah tepawah runding mendingka petenah ari penyakal.

Ku iya, nyauka 500 iku raban JKKK ari pelilih Miri, Beluru, Niah, Marudi, Long Lama, Tatau, Bintulu, Limbang en ggau Lawas udah nyereta program Sijil Tadbir Urus nya.

“Fasa 1 ungkup Zon Sarawak udah diatur kena 23 nyentuk 25 Mei di Kuching ke digulu 500 iku raban JKKK ari Kuching, Samarahan enggau Serian,” ku iya.

Bela bisi ngulu pengerami nya Pengarah Institut Pemansang Desa, Datuk Rubiyah Abdul Rahman.

Share this article!