‘Single’ pemadu baru Isa Lee, ‘Tubai Pengerindu’ udah dimain ba churung radio

Isa Lee

KUCHING, Ogos 1: Penatai artis baru ngeranchakka agi industri pemerindang. Nyau majak mayuh komposer lagu enggau muzik ke landik sereta kreatif. Kitai ulih mantaika asil pengelandik seni diri enggau nadai sekat tauka adan. Reti nya kitai ulih ngereja pengawa seni kitai enggau chara lantang tauka nitih peneka ati diri.

Isa Lee mansutka jaku tu lebuh iya dirandau kemari pasal single baru iya Tubai Pengerindu. Tubai Pengerindu nya single rentak balada ke ngelui dua minggu udah pas diserenih RTM.

Naka ke diatu lagu nya udah dipasang ba Waifm Kuching enggau Catsfm. Udah tu lagu nya udah ulih dipasang tauka didinga ari Waifm Sri Aman, Sibu, Bintulu enggau Miri. Mensia mayuh ti rinduka lagu tu tau minta lagu nya ba program lagu peminta ari dejay radio tauka pengeluar program ti dikerinduka kita.

“Tubai Pengerindu nya siti drama pengidup; maya bepangan. Pengerindu datai enda disadang pulai enda ulih tagang. Tubai (rachun pengerindu) tau ngasuh mabuk lalu ulih mega ngasuh mati.

“Baka nya mega pengerindu ti bendar nemu ngasuh mamau tauka sakit angau. Cherita lagu tu nya utai ke amat udah kala nyadi ba pengidup aku.

“Pengerindu nadai penanggul tau ngasuh lantang tang pengerindu ti mar lalu ngasuh idup tusah. Mabuk pengerindu nadai sekat enggau adan; tuai biak sama ulih magang.

“Kenang lagu Tubai Pengerindu tau nyadika teladan laban iya ukai semina lagu pia aja tang iya ngajar reti pengelurus ati; enda bula sereta meras ati maya besulu,” ku Isa ke diatu benung kiruhnembuka album enam iku artis baru MK Smokehouse begulai enggau Ranyai Studio di Kuching.

Ditanya sekalika Tubai Pengerindu semina nyadi single didinga ba radio aja, Isa madah lagu nya deka dipasukka ba album kompilasyen begulai enggau artis bukai udah tu ila. Penerang ke silik pasal pekara nya bedau ulih dikunsika ditu.

“Aku meri besai terima kasih ngagai pemuzik Cami Ranyai, Amerio Evan, Oliver Christy OCHP, Pak Iran, Jimbun Tawai, Ranyai Studio, Harold Unsie ke udah suah nulung ba pengawa rekoding enggau ngelatika leka lagu. Terima kasih mega ngagai semua dejay radio Waifm enggau Catsfm laban ulih masang Tubai Pengerindu. Terima kasih mega ngagai bala pangan ba facebook ke suah meri jaku peransang. Terima kasih semua,” ku Isa ngujungka saut iya. — DayakDaily