Roxanne Lee, artis bansa China nyada lalu ngaul diri dalam industri musik Iban 

Roxanne Lee

KUCHING, Okt 5: Jaku sempama “Belakang duku enti diansah pan tau meh tajam” mandangka pengeliat ati sesiku deka ngulihka utai ti dikinginka.

Juluk nya ulih dijapai enti dikereja enggau ati lurus sereta bebendar.

Pengeran nya mega tau dikemeranka ba dunya pemerindang enti liat ati deka ngubah pengelemi diri lalu nya deka meri asil ti manah, pia ku Isa Lee, produser album kompilasyen tujuh iku artis MK Smokehouse.

Penerang nya mega dikena iya ngenang siku indu bebansa China, Roxanne Lee, ke nyadi artis ti sama bisi enggau ngaga album nya ke deka dipansutka enda lama agi.

Isa madah munyi nya lebuh dikerandau pemberita ari DayakDaily maya proses ngaga klip video Roxanne Lee ba kandang Bandaraya Kuching nyengkaum Marian Hotel enggau laman Dewan Kunsil Negeri Lama Petra Jaya.


Tujuh artis dalam album kompilasyen iya nya Mecklyen Julih, Ester Jeffery, Jeft Regos, Reaza Ray, Angela Ryann enggau Roxanne. Dalam album nya mega bisi diselitka sebuah lagu duet ti mantaika Angela Ryann enggau Isa.

Naka ke diatu ketujuh-tujuh lagunya udah tembu proses rekoding vokal di Ranyai Studio Kuching.

Lebuh ditanya sentang pengelebih album nya, Isa madahka album nya ngaul bemacham pupu bansa. Kelimpah Roxanne ke bansa China, Reaza Ray Ho penakan China Filipina Iban, Mecklyen enggau Ester bansa Kayan, Regos bansa Bidayuh lalu Angela bansa Iban.

“Dipelabaka semina album tu aja album lagu Iban ke ngaul pupu bansa ti mandangka pemaik pengidup raban bansa di Malaysia ke diau di Sarawak.

“Ke bendar tu ukai disengaja tang pemutus pekit ke ngempung sida begulai ari baruh produksyen MK Smokehouse ti bekerejasama enggau Ranyai Studio”, ku Isa ti nyadi komposer dalam album tu.

Roxanne, Isa (kanan), begambar enggau bala bukai maya ke ngaga klip video nya bedau lama udah.

Lebuh dipinta bekunsika pemar napi Roxanne ti enda landik bejaku Iban, Isa madah diri ngajar siti-siti chara nyebut leka jaku enggau reti tetiap leka lagu.

Bebekalka pengelandik enggau komitmen tinggi ke dikembuan Roxanne, semua penanggul nya ulih diputarka.

Ku Isa, Roxanne siku orang ke jampat meretika utai diajar laban disiplin ke tinggi kelimpah sukung penuh ari kededua apai indai iya.

Tujuh buah lagu dalam album kompilasyen ke bedau diberi tajuk iya nya Ambai Aku (Mecklyen Julih), Tanda Tanya (Reaza Ray), Joget Ngatika Diri (Ester Jeffery), Dara (Jeft Regos), Bujang Meligai Keling (Angela Ryann), Sanggup Nganti (Roxanne Lee) enggau Danji Tua (Angela Ryann & Isa Lee).

Bela enggau ba proses ngaga klip video maya nya, eksekutif produser Lee Ramos, Reaza Ray, pemuzik Cami Tan enggau kededua apai indai Roxanne.

Isa diatu ke benung kiruh ngelakuka “single” iya Tubai Pengerindu ngarapka peminat lagu Iban mega bela nganti pemansut album tu.

Ku Isa, Tubai Pengerindu udah sebulan dalam charta sapa juara Wai FM ngarapka penuduk lagu nya majak manah sereta nerima sukung penuh ari mensia mayuh.

“Aku deka meri besai terima kasih ngagai peminat lagu Iban ti semampai mandangka sukung positif. Sukung meh bala artis kitai kelebih agi lagu-lagu baru.

Artis lama meseti terus diangkat sereta dipebasa. Ngarapka industri muzik di Sarawak ulih meri penatai pemisi ngagai bala artis enggau ti ngemeranka seni “, ku Isa nutup randau. — DayakDaily