‘Perintah nengeri patut nyerenih baru polisi, ordinan kampung di Sarawak’

Datuk Patinggi Abang Johari Tun Openg

KUCHING, Ogos 1: Perintah nengeri Sarawak patut nyerenih baru polisi enggau ordinan dikena ngenegapka agi atur pengawa ngatur kampung enggau industri ti bepelasarka kayu ngambika seriris enggau isu ti deka ditapi sektor kampung menua sereta global.

Kepala Menteri Datuk Patinggi Abang Johari Tun Openg madahka langkar polisi nya diatu ba renggat diperunding kepenudi sebedau dikemendar.

Entara polisi ti dipansik baru sereta tu baru dibantaika iya nya Polisi Kampung Sarawak, Ngenukuka Pengawa Ngatur Kampung, Pemansang Kampung endur Betanam tauka Industri, Pelin Pemansang Industri Kayu, pwrengka mata ungkup industri kayu batang enggau asil kampung, kelebih agi ses ari produk ti nangkan ke produk keterubah.

“Seriris enggau ubah ke udah digaga ngagai polisi kami, perintah nengeri minta semua lisin kayu batang kampung timpuh panjai ngulihka Persijilan Pengurusan Hutan (FMC) datai ba taun 2022.

“Sebedau tu, FMC semina dikena ari pengawa voluteer,” ku iya bejaku ba pengerami bejadi Persidangan Perhutanan Malaysia (MFC) 2018 di sebuah hotel ditu.


Ku iya madah, berindik ari penyiru ti bisi ba renggat menua sereta global bekaul isu rampa menua, FMC diatu nyadi siti ari guna ti besai ungkup orang ti meli dikena nentuka kayu batang enggau produk ti bepelasarka kayu datai ari kampung ti endang diatur enggau seriri.

Abang Johari madah, perintah nengeri udah numbuhka polisi kampung ti tegap knyau ari taun 1954 menya dikena nentuka kampung di Sarawak enda dipenyati ungkup pemansang sebagi ari komitmen dikena nentuka asil kampung diatur enggau manah.

Dulu agi ari nya, dalam jaku iya, Direktor Opis Kampung Sarawak Hamden Mohamad madahka MFC iya nya forum ungkup sida ti bekaul enggau pekara kampung di Malaysia dikena betukar penemu, penerang sereta peneleba ari sukut pengawa ngatur enggau pemansang asil kampung di menua tu.

Urung 600 iku pesereta enggau orang ti ngemataka baum nya ti berambai jaku ‘Ngemajuka Kampung enggau Manah Nengah Digital sereta Teknologi’. — DayakDaily