KUCHING, Feb 16: Presiden Parti Sa’ati Rayat Sarawak (SUPP) Datuk Sim Kui Hian, madahka parti nya semampai sedia nerima semua ex-kaban parti nya ti deka nyadi kaban parti nya baru enggau ati ti lurus.
Sim madah, iya mansutka jaku nya ukai semina dituju ngagai ex- kaban parti ti udah nyadi kaban Parti Rakyat Bersatu (UPP) diatu, tang mega ngagai semua parti nyengkaum parti penyakal.
Bejaku pengudah ngabas penyendia Pengerami Nyambut Temuai Tahun Baru Cina (TBC) 2018 ke deka diatur SUPP ba Dewan Sa’ati SUPP empai lama, Sim mengelaluka penatai semua kaban parti enggau ex-kaban parti ngagai pengerami nya ke diatur sehari tu.
“Tu mih maya kitai berakup baru, ngerami hari ke manah tu laban rayat dekaka kitai beserakup,” ku Menteri Kandang Menua enggau Pengawa Berumah nya.
“Taun tu taun ukui, aku dekaka kitai beserakuo laban deka meda Sarawak nyadi negeri ke kering,” ku Sim ke mega Kaban Kunsil Negeri (ADUN) Batu Kawah ngenang juluk ati Kepala Menteri ti mega Chairman Barisan Nasional (BN) Negeri Datuk Patinggi Abang Johari Tun Abang Openg ke deka meda SUPP-UPP begulai baru.
Abang Johari enggau menteri kabinet negeri ke bukai dipelaba ngulu pengerami nyambut temuai nya.
Abang Johari mega dipelaba ngulu pengerami nyambut temuai SUPP Miri kena Feb 17 ditangkanka SUPP Sibu kena Feb 20. — DayakDaily
