KUCHING, Feb 16: Opis Kepala Menteri Sarawak kemari ngenadaika tulis ba media sosial ti madahka Kepala Menteri, Datuk Patinggi Abang Johari Tun Openg meri ultimatum tauka jaku tangkan ngagai Petronas.
Seraya madahka diri enda lantang ati enggau berita bula nya, opis Kepala Menteri nya mega madahka Abang Johari nadai kala ngaga pengawa nya.
“Opis tu deka madahka Kepala Menteri nadai kala ngemansutka jaku tangkan ngagai Petronas taja pan nyadi tanggungpengawa Petronas nitihka untuk undang-undang negeri tu baka kompeni bukai ti deka bisi ati enggau prospek sereta ngelumbung di Sarawak.
“Iya (Kepala Menteri) mega semampai beratka deka bekerjasama enggau Petronas nengah kompeni minyak ti baru ditumbuhka, PETROS dalam sektor minyak enggau gis di Sarawak bepelasarka penetap undang-undang enggau konstitusyen, ku opis nya kemari.
Nengah pemadah media sosial ke bejudul ‘Ultimatum to Petronas, Get Licence or Get Out,’ (Jaku tangkan ngagai Petronas, Ulihka Lisin tauka Pansut ) ti dikerembaika nya, Kepala Menteri Sarawak dipadahka meri jaku tangkan ngagai Petronas ke alai kompeni nya meseti ngulihka lisin ari baruh Ordinan Ngelumbung Minyak Negeri 1958 ngambika ulih beroperasi di Sarawak. — DayakDaily
