Sibu dikelala nyadi pintu penama barang ke dibai tama belalai

DayakDaily.com file pic. // Photo: Pixabay

SIBU, Mac 15: Sibu dikelala nyadi pintu penama sereta palan nyadung bemacham bengkah barang ke dibai tama belalai ngagai endur bukai di Sarawak.

Pegawai Pemerintah Batalion ke-10 Pasukan Gerakan Am Sibu, Superintendan Sanudin Md Isa madahka barang ke dibai tama belalai baka insap putih enggau kretek serta ai bisa ke dipelaba dibai tama ngena kapal besai nengah sungai.

“Udah nya barang diagih ngambika dsadung ngagai bagi menua bukai, nya alai kami deka chakah agi mantu ngemuntan pengawa mai barang tama belalai th baka ti dipejalaika ejensi penerit adat bukai,” ku iya ba aum media di Kem Lanang kemari.

Ku Sanudin, dikena ngemujurka nya pansik deka mayuh agi dipejalaika lalu mensia mayuh mega diperansang meri pemadah ngagai sida.

Kelimpah barang ke dibaj tama belalai, iya mega madahka sida fokus ngagai pengawa ngemunas aktiviti berimba kayu nadai pemendar.

Dulu ari nya, Sanudin madahka sida udah ngerampas bemacham bansa ai bisa enggau insap ke dipechaya barang ti dibai tama belalai ba dua bengkah endur kemari ke alai penyampau barang ti dirampas nya dianggar RM75,000.

“Seraban 10 iku pemesai betuaika Inspektor Mohd Hafizhazman Hassan udah ngabas ngenyit dua buah rumah ti nadai diuan orang ba Jalai Nibong enggau Jalai Berlian, urung pukul 10 pagi enggau 12 tengah hari,” ku iya.

Ba operasi keterubah, sida tetemuka 1,125 karton rinsap putih enggau kretek bemacham bansa chap enggau bansa ari menua bukai dalam sebuah garaj beatap di rumah nya lalu 690 karton insap putih enggau kretek sereta 324 butul arak bemacham chap ditemu ba endur kedua.

Ku iya, ripot polis udah digaha ba Balai Polis Sentral Sibu lalu barang ke dirampas nya diserah ngagai Opis Nagang Ulah Makai Suap Malaysia (SPRM) ti deka diserah ngagai Opis Kastam Diraja Malaysia Pampang Sibu. — DayakDaily