KUCHING, 21 Dis: Parti Bansa Dayak Sarawak (PBDS) netapka semina raban dalam parti aja ulih dichiri nyadi chalun ba pengawa bepilih ti deka datai.
Nitihka penerang Sekretari Besai PBDS Julius Enchana, orang ti deka bediri minta pilih nguna lambang PBDS meseti ngerejister diri nyadi kaban parti.
Tajapia ku iya, chalun ngarika parti deka ditentuka komiti pengawa bepilih.
“Nadai orang dikemendarka nyadi chalun ti semina nguna lambang parti aja.
“Pekara tu nyelepah ari atur pengawa bepilih ke udah ditetapka dalam konstitusyen PBDS,” ku iya nengah siti surat penerang berita kemari.
Tambah Julius, bisi didinga berita alai sekeda orang ari parti bukai deka bediri minta pilih nguna lambang PBDS.
“Pekara tu enda diterima laban iya salah ba konstitusyen. Nya alai, enti kita deka ngari ka PBDS, rejister diri nyadi kaban belabuh ari diatu,”tandu iya.
Ngenang kaul ke sama, Julius madah PBDS parti ti teguh enggau penemu sereta enda ulih nerima “temuai pulai ari”.
Beduduk ari nya, iya minta bansa dayak enda malu ngari ka parti ba pengawa bepilih laban PBDS ke diatu enda baka ke dulu sereta siti parti bansa dayak Sarawak ke tulin.
“Kitai ukai enda nerima bansa bukai dalam PBDS, laban parti tu parti ungkup bansa dayak aja.
“Kebuah ti besai iya nya kitai enggai ka pekara ti nyadi ba SNAP enggau PBDS ke dulu, nyadi ba parti tu,” ku iya.
Julius nambah, idea politik pupu bansa enda diterima dalam PBDS.
Tajapia ku iya, ba gerempung parti politik, PBDS nadai penanggul begulai enggau parti bukai sereta ngari ka hak dayak. — DayakDaily
