KUCHING, 20 Jan: Kena 20 Januari 2021 dia alai bala anak Sarawak ti ada kena maya tu ba taun 1971 nyau udah manggai umur 50, retinya nya sida nyau manggai ba setengah umur.
Haribulan 20 Januari 1971 sigi besai endar reti dalam sejarah ti ngentapka pengelikun enggau pemaik di menua Sarawak.
Nitihka penerang lecturer pemansik ari Universiti Malaysia Sarawak (Unimas), Profesor Madya Dr Neilson Ilan Mersat, lebuh maya tu meh keterubah iya bala komunis nyerang bala sedadu ngena jalai tegah tauka ‘ambush’ ba sungai di Sarawak.
Ku Neilson, pengawa ti baka tu endang siti ari jalai bala komunis ngelaban bala sedadu ti mayuh betengahka jalai sungai lebuh maya nya menya.
Tegah bansa tu ulih ngalahka sedadu enggau nyamai agi laban sida ti ditegah nya benung nepan perau sereta pedis deka malas enti ditimbak.
Neilson nusuikan cherita sejarah bala sedadu ti ditegah munsuh komunis di Katibas nengah pansik ti diadu begulai enggau siku agi lecturer pemansik Unimas, Dr Regina Garai.
Kena 20 Januari 1971 lebuh dua buah perau sedadu betubuh 13 iko ari Markas Tek di Nanga Engkuah benung mudik mulaika diri ari Nanga Bangkit dia alai perau sida ditegah munsuh ba urung menua ti dikumbai Tanjung Batu Babi di Batang Katibas.
Raban sedadu tu baru pulai bepadah, nesau bala Tuai Rumah ngasuh sida datai nguang ngagai siti pengawa sesi randau di Nanga Engkuah kena 21 Januari 1971.
Ba pansik tu, Neilson sereta Regina bisi berandau enggau dua iku sedadu ti bela betachah ngelaban munsuh maya nya.
“Lebuh kami mansa tanjung nya, dia alai perau ti ditepan aku lalu diperejin bala komunis ti endang lama udah nganti deka negah kami ba tebing kanan mudik Sungai Katibas.
“Peluru ti nyelinting kami nyau baka leka ujan. Orang ti jaga luan perau aku kena timbak lalu enda benyawa ngujungka iya terus labuh ka ai Katibas ti benung besai sereta deras,” ku Lt Kolonel(B) Anwar Basha Khan lebuh nguji mulaika pengingat iya lebuh maya ti kena tegah nya.
Anwar enggau bala iya sama malas nimbak munsuh ti ngujungka Anwar kena ba pala sereta enda ulih betimbak agi laban jari iya nyau enda ulih ngachitka senapang ketegal ari kerubung pala iya kebus kena leka peluru.
Ngasai pemedis diri, Anwar nguji ngerayapka belakang perau ngagai alai injin tang injin nyau udah jai laban kena timbak komunis lalu ngujungka perau sida anyut.
Dua iku ari bala iya ti sama nepan perau bela terejun muai dirika ai Katibas.
Siku ari sedadu ti sama ba luan iya nya Sarjan Midung Gunde sama mega malas nimbak bala komunis ti ngujungka lengan kanan iya anchur sereta pechah kena peluru.
Kelimpah ari lengan, patung Midung mega kena timbak komunis ti ngujungka kaki kiba ia agi meruan pedis nyentukka seharitu.
“Aku sigi nadai nemu diri idup laban perau kami endang udah ba tengah-tengah ai lalu nyamai alai komunis nimbak kami,” ku Midong ti asal ari Kampung Serasot di Bau.
Enggau ati ti berani sereta keran deka ngalahka munsuh dia alai perau ti entudi ti betuaika Pegawai Waran II Lenggu China lalu ngelih perau Anwar lalu nguji ngansak ke tebing alai munsuh sereta nachahka munsuh ari mua masuk ngagai “killing area”.
Tu meh maya bala komunis nyamai ngiching lalu nimbak sida ti ngujung ka semua sida enam iko dalam perau nya kena timbak sereta mati magang.
Perau sida lalu ngelantak tebing ba mua munsuh ti ngaduka tegah. Ba pengawa betachah nya, Lenggu agi bisi seput lebuh ti ditabankan ngagai Nanga Engkuah tang empai lama udah nya iya ngapuska seput diri.
Anwar enggau Midong lalu ditaban ngena helikopter malamnya ngagai sepital di Sibu.
Bekau penusah nya Midong berubat di sepital dalam pengelama 28 hari lalu Anwar nadai nemu orang dalam pengelama empat hari lalu diperubat ba sepital kira dua bulan.
Ari ti kena leka peluru ba pala dia alai Anwar lalu mati tubuh sepiak. Iya terus diperubat nyentukka gerai tang enda ulih enggau ngiga munsuh dalam babas agi laban iya diberi status Base Everywhere tauka BE.
Ku Neilson, pemerani bala sedadu ti belaban enggau bala komunis lebuh kena tegah di Tanjung Batu Babi endang balat dipuji ti ngujungka bala sedadu majak tampak nama jelai rita.
Presiden Gerempung Veteran Sedadu Kor Ranger (PVTKR), Lt Kolonel Mohd Melintang muji pemerani sida tu lalu madahka sida tu sigi amai-amai bepegai ba jaku peransang renjer “Agi Idup Agi Ngelaban”.
Pemerani sida tu patut nyadika chuan enggau teladan bala nembiak rebak baru. Tu mega mandangka pemesai budi bala renjer ti sanggup berambunka nyawa dikena ngetankan pengelikun menua.
“Ba reti ti besai agi, pemaik ti disepi kitai diatu endang datai ari pemerinsa enggau pemedis ti diasaika bala sedadu ti udah berambunka nyawa sida,” ku Melintang.
Dalam tegah ba Tanjung Batu Babi di ai Katibas nya dia alai bisi enam iku bala sedadu mati lalu bala komunis bisi mati empat iku.
Anwar enggau Midong endang seruran ingatka Tanjung Batu Babi lalu arapka pengawa sida nya tetap dikenang lalu dikelala rayat menua.
Nitihka pemansik, Regina, pekara ti nyadi ba Tanjung Batu Babi endang mandangka pemerani bala sedadu lebuh ngetanka menua ketegal deka ngaduka pemaik bala mayuh.
Ku Regina, semua sida ti enggau betachah ti sama ensepi pemedis lebuh kena tegah komunis maya nya sigi tau digelar bala bujang berani magang.
“Tajapan diatu sekeda ari kitai enda ingatka utai ti nyadi maya tu tauka enda ngelala sida, tang sida meh orang ti patut dipuji laban udah bebendar ngetanka menua kitai ari langgar munsuh.
“Endang sigi patut kitai ngingatka sida laban ti udah nyadi Bujang Berani ba tegah Tanjung Batu Babi,” ku Regina.
Kelimpah ari Pegawai Waran Lenggu ti bulih bintang Sri Pahlawan ketegal ari pemerani iya lebuh betachah ba endur nya bala bukai ti enggau betimbak lebuh kena tegah di Tanjung Batu Babi endang patut digelar kitai Bujang Berani magang.
Laban sida tu meh orang ti Maing Muting Geraji Tajam Gerenyam Nyemilu Tisi. Setempap enda rarat, setumbit enda nginsit lalu sekaki sigi enda rari. — DayakDaily
