SDMAA bepekit ba ‘Martial Arts Mastership 2019’ di Chung Ju, Korea  

Henry (bediri dibelakang, tujuh ari kiba) begambar bebala mayuh enggau kontinjen SDMAA.

Chris Bishop

KUCHING, OGOS 26:  Sarawak nganjung kontinjen bepekit ba ‘Martial Arts Mastership 2019’ ke diatur di Chung Ju, Korea berengkah 1 ngagai 6 September 2019.

Kontinjen Sarawak diarika 20 iku orang ari Gerempung Kuntau Dayak Sarawak (SDMAA) ti mungkur raban penyereta, guro sereta pemesai.

Kaban Kunsil Negeri(Adun) Tasik Biru Datu Henry Jinep nyuaka menira Sarawak ngagai Penyanding Penemu SDMAA Dato Sia Siow JOO di Palan Penerbai Bilun Entarabangsa Kuching (KIA) ditu, lemai tadi.

Henry datai ngarika Sapit Kepala Menteri Datuk Amar Douglas Uggah.

Ketuai Kontinjen, Rick Hanson Gumbang madah tu keterubah iya SDMAA bepekit ba renggat entarabangsa.

“Tu keterubah kali kami bepekit ba renggat dunya alai kami berasai temegah ulih ngarika Sarawak, pia mega ngarika Malaysia.

“Tajapia, kami ngarap ulih menang sekeda midul,’ku Hanson lebuh dikerandau.

Hanson nambah, bala penyereta udah bendar belatih dalam timpuh dua bulan ke udah alai bala guro chukup perchaya sida ulih menang sekeda midul ba Chung Ju.

Kelimpah bepekit ku Hanson nambah, kontinjen mega ngembuan juluk deka ngelakuka Sarawak nyadi siti agi palan endur ngatur pekit ke sama.

“SDMAA deka minta ‘Gempung Martial Art” meransang penyereta ari menua bukai datai ke Sarawak.

“Kitai deka ngatur pekit ke sama ninting taun di Kampung Budaya Sarawak,’ku iya.

Ba pekit di Chung Ju serak tu, kontinjen Sarawak bisi diarika empat iku penyereta ari Gerempung Ngajat Asal Iban (NGASI).

Nitihka penerang Guro, JoeFrazier Jeffery Kemping, empat iku penyereta nya deka mantaika kuntau rimoung. — DayakDaily