KUCHING, Mac 14: Kampung Budaya Sarawak (SCV) ngambi inisiatif ngelancharka dagang digital setipak enggau dunya digitalisasi sereta pelin ekonomi digital perintah negeri.
Chairman SEDC Tan Sri Datuk Amar (Dr.) Abdul Aziz Husain udah ngelancharka nya beserimbai enggau Pengerami Penumbuh Ke-28 SCV enggau Pengerami Makai Lemai Ninting Taun sida.
Ku Abdul Aziz, anak kompeni Perbadanan Pembangunan Ekonomi Sarawak (SEDC) nya ngepunka dagang digital dikena ngetembus makit di serata dunya.
Bejaku pengudah ngelancharka nya, Abdul Aziz pechaya dagang digital mantu temuai jampat agi ngelala Sarawak enggau betul sentang palan ti manah di negeri tu nyengkaum SCV.
“Nengah dagang digital tu, mayuh agi temuai ari menua luar ngelala Sarawak sereta nemu SCV nemgah chara meda bemacham main asal bansa di Sarawak.”
Abdul Aziz ngarapka, singkang SCV nyadi chunto anak kompeni SEDC ke bukai nyengkaum ngelakuka produk sida nengah chara digital.
Iya mega meransang orang dagang SEDC ngambi inisiatif sama ngelakuka produk tauka servis sida nengah chara digital.
Bekaul perengkaguna, Abdul Aziz madahka SEDC merambu ngemanah SCV yi udah beumur nyauka tiga puluh taun nya ti tebilang enggau Festival Muzik Hutan Hujan Sedunia (RWMF).
Diatu SCV agi nganti ungkup belanja dikena ngangkatmanah palan nya nengah chara berenggat. — DayakDaily
