SBST deka belabuh beoperasi taun baru

The proposed bus design for the Stage Bus Service Transformation.

SADONG JAYA, Nov 21: Servis perengka pengangkut mensia mayuh ke baru nengah program Transformasi Perkhidmatan Bas Henti-Henti (SBST) deka berengkah beoperasi di bandar raya Kuching taun baru.

“Pengerami nyain memorandum pemereti ati (MoU) entara perintah besai enggau perintah negeri sereta Konsortium BBK Sdn Bhd ke nyadi operator diatur kena Hari Tiga tu,” ku Menteri ba Opis Menteri Besai Datuk Seri Nancy Shukri.

Bisi 130 buah bas baru ke disikap enggau perengkaguna sistem kad elektronik ti nguna kad ‘touch-n-go’, WiFi, Sistem Penuduk Global (GPS) enggau CCTV dikena nambahka tikas pengelikun.

“Bandaraya Kuching sebuah ari enam mengeri besai keterubah di serata menua ke dipilih endur ngemujurka projek keterubah SBST nya,” ku Nancy.

Ku iya, projek SBST di bandaraya Kuching mungkur urung 560km bagi 15 batang jalai (Kuching ke Politeknik Matang, Kuching ke Damai, Kuching ke Bako enggau Kuching ke Kota Samarahan) sereta 12 jalai bukai.


Ku Nancy, inisiatif transformasi servis bas nya ulih ngangkatka kualiti servis perengka pengangkut mensia mayuh mgambika manah agi lalu meri empas ngagai peranak ngelingi nya. — DayakDaily